Nongstoiñ, Nailur 08: Ki riew kieng atiar kiba lah tap dur khmat ïalade, la suba ba ki la leit syntiat haduh arsien arwat ïa ka Ïing sah u Syiem ka Hima Nobosohphoh, West Khasi Hills, kaba la antad ba ka lah ban dei ka jingthwet bad mut sniew ïa u Syiem jong ka Hima. Une u Syiem ka Hima Nobosohphoh u dei u Pa’iem Kawangbor Syiemiong.
Ki kur ki kha kynthup ka Ïing ka sem bad ki hynmen ki para jong u Syiem, ki la pynpaw ïa ka jingsngewkhia kaba jur haba ïoh jingtip ïa kane ka jingwan syntiat jong kine ki riew tap khmat bad ba kieng suloi, ïa ka ïing sah u Syiem.
U Bah S.Nongdkhar u ba dei u nongaiktien ka Ïing u Syiem, ha ka jingïadonlang u Bah S Syiemiong, hynmen u Pa’iem Kawangbor bad u Bah P.Nongdkhar kynum jong u Pa’iem bad kiwei kiwei, ki la ïathuh ba ka jingsyntiat nyngkong ka la jia ha ka 26 tarik u Nailar 2024 bad la pyntip ba ki don ar ngut ki briew kiba lah kah dur khmat bad kieng suloi, kiba la wan ban ieng hajan ka Ïing sah u Syiem.
La ong ba ka sien kaba ar ka la jia ha ka 3 tarik u Nailur bad ha kane ka sngi ruh ki don ar ngut ki briew ba la kah dur khmat, ïa kaba la suba jur ba ki lah ban dei ki juh ki briew.
Ki bahaïing ki pyntip ba ha ka 3 tarik Nailur, kine ki briew ki la wan ha ka por 5 baje janmiet ei ei bad uwei u samla Shnong ruh u la ïohi ïa kitei ki briew, hynrei tang khyndiat por kine ki briew kila phet noh bak sha khlaw.
Namar kitei ki jingjia, ki Kur ki Kha jong u Syiem Kawangbor, ki la lum ïa ka jingïalang hynne ka sngi ban ïa pyrkhat sani bad ïathir jingmut ïa kaei kaba dei ban leh. Ki la khot ïa kine ki briew ba tap dur khmat ba kin wan shakhmat ban ïakren ha ka miej jingïakren bad ki lada kim lah ban ïa sngewthuh jingmut shuh bad u Syiem.
Ki la pynpaw ba ka Ïing ka long kaba kloi ban shim ïa ka jingkitkhlieh, ban ïakren sngewthuh bad ki ym ban shu wan syntiat pyntieng bad pynrit mynsiem ïa baroh.
Halor kitei ki jingwan syntiat, u Pa’iem Kawangbor Syiemiong, u la leit buh da ka ejahar ha Nongstoiñ Police Station.
