Shillong, Nohprah 06 : Ka sorkar jylla da ka thong ban pynshlur ïa ki paidbah ban rep ban riang bad thung soh ha ka sngi Balang ka la pynlong da ka prokram ban pynsngewthuh bad pynshlur ïa ki nong Mawkynrew ba kin sdang noh ïa ka rep Strawberry.
Ha ka jingïalang kaba long ha Mawkynrew C&RD Block, ka Myntri ka tnad ka rep ka riang, Kong Ampareen Lyngdoh ka la leit ban don lang bad pynshai ïa ki paidbah ba ka sorkar ka buh hakhmat eh ban plie lad bad kyrshan ïa ki paidbah ha ka rep ka riang.
Ka Myntri ryngkat ki ophisar ki la sam ruh ïa ki tynrai strawberry ban pynshlur ïa ki paidbah nongrep ba kin phaikhmat sha katei ka kam rep kaba don jingkyrmen bha ban kyntiew ïa ka ïoh ka kot.
La donlang ruh ha kane ka sngi naduh ka Secretary ka tnad, Kong Isawanda Laloo nalor kiwei kiwei.
Katei ka jingpyrshang ka long ruh kum ka sienjam ban plie kham bun ki lad ki lynti ïa ki nongrep bad kumno ban kyntiew ïa ki nongrep na ka thaiñ haba ïadei bad ka kam rep.
Na ka liang ka tnad Horticulture ka buh ruh ka thong ban plie lad shuh shuh ïa ki nongrep ka jylla na bynta ban kyntiew ïa ka ïoh ka kot ha ka jylla hi baroh kawei.
