Shillong, Naitung, 22: Ka Meghalaya State Commission for Women (MSCW) ha ka sngi Saitjaiñ ka la dawa tyngeh ïa ka Sorkar Pdeng bad ïa ka Sorkar Manipur ba ki dei ban kem bad ban pynshitom lut ïa baroh kiba don kti ban pynïaid lyngkhuid ïa ki arngut ki kynthei ha ka jylla Manipur kaba dang don mynta ha ka jingïaumsnam bad ka jingïakynad kaba jur hapdeng ki jaitbynriew Kuki bad k Meitei.
Ka Commission ka la kyntu ruh ïa ki bor synshar jong ka Jylla Manipur ban pynthikna ïa baroh ki briew kiba la kylla lanot ha ka jingïakynad jaidbynriew ba ki dei ban ïoh ïa ki lad jingïarap bad ki jingïada kiba biang.
Ha u kyrwoh ba la phah sha ki lad pathai khubor, ka Commission ïai ban ba kum kine ki jingjia ba pyntriem ki buh jingma ïa ka burom bad ka ijot jong kawei pa kawei ka kynthei bad ïa ki khynnah ha ka ri. “Kano kano ka jingthombor ïa ka long rynieng jong ka kynthei ka dei ka kam ka bym lah lah satia ban pdiang ha ka riti synshar jong ka ri synshar paidbah,” la ong ka Commission.
Haba pynpaw ïa ka jingkhia mynsiem halor ka jingpynkheiñ ïa ka hok longbriew manbriew, ka Commission ka la pynpaw ba ka jingpynlong sohpdung ïa ki jaidbynriew rit paid bad ïa ki jaidbynriew kiba tlot ka long ka bym lah ban pdiang bad kaba pynsngewkhia haduh katta katta.
Ka jingjia ba dang shen, kaba la pynkhynwin ïa ka ri baroh kawei, ka la dawa ïa ki Pulit jong ka Jylla Manipur ban kem mardor sa ïa uwei pat uba donkti katkum ka dur kaba paw ha ka video kaba la saphriang ha ka Social Media ha ka 19 tarik mynta u bnai, ka pyni ïa ki arngut ki kynthei kiba la shah pynlaw lyngkhuit bad shah pynïaid hakhmat u paidbah byllien.
Ka Commission ka la pynpaw ruh ka jingsngewnguh ïa ka National Human Rights Commission (NHRC) bad ïa ka Ingbishar Supreme Court kiba la shimkhia mardor ïa kane ka kam.
Ka Ingbishar Supreme Court, kaba la dap da ka jingkyndit kaba khraw halor ka video ba la pynsaphriang, ka la kynthoh ba ka jingpynlong sohpdung ïa ki kynthei ban leh ïa ki kam pyntriem ka dei ka bym lah satia ban pdiang ha ka ri synshar paidbah. Halor kane ka jingjia, ka Ingbishar ka la hukum ïa ka Sorkar Pdeng bad ïa ka Sorkar Manipur ba kan leh eiei noh mardor, ban ai jaka riehtngen bad ban ai ïa ki lad jingïada bad ban phah ïa ka kaiphod halor ki kam ba la leh.
Ka Manipur ka la bthei na ka jingïakynad jaidbynriew kaba la jia naduh ka 3 tarik Jymmang, 2023, ha kaba ki jaidbynriew heh paid kiba buhai shnong ha them Imphal ki la ïaumsnam bad ki riewlum Kuki kiba sah ha ki jaka rilum. Kane ka jingïakynad kaba dang neh haduh mynta ka la sakhi ïa ka jingduhei haaduh 160 ngut ki mynsiem briew bad bun ngut kiba la mynsaw jur. Ka jingïaumsnam ka la khie hadien ki jaidbynriew Kuki ki la pynlong da ka jingïaid paidbah ban pyrshah ïa ka jingdawa kyrdan Scheduled Tribe (ST) da ki jaidbynriew Meitei.
Ka Commission ka phah ruh ïa u kyrwoh pyntngen sha ki bahaing hasem jong ki lanot kiba la mad ïa ki jingshah pyntyrha ba harrukom bad ïa ki jingduhnoh ïa ki baieid bathoiñ bad ïa ka ing ka sem.
