Shillong, Naitung 22 : Ka United Democratic Party (UDP) hynin ka sngti ka la kyntu ïa ki paidbah nongshong shnong ka Manipur ba kin sangeh noh ka jingïaum snam khnang ba sa shisien yn lah ban wallam biang ïaka suk ka sain ha ka jylla.
“Ka jingïa kynad ka wanrah ïa ka jingïaumsnam bad kan ym sangeh shuh lada ailad ba kan ïai bteng. Ka jingsuk ka lah ban wanphai biang tang lada ki nongshong shnong ka Manipur hi ki pynbeit bad burom ïa ka hok jong kiwei pat,” ong u General Secretary ka UDP, Bah Jemino Mawthoh ha ka kyrwoh.
Da kaba kam ba ka thain shatei lam mihngi jong ka Ri kam lah ban bteng ïa kine ki jingïakynad kan ïai bteng u Bah Jemino u la ong ruh ba ka juk ba ka thain shatei lam mihngi kadei ka jaka ïa kynad ka la kut bad kumta ka por ka la dei ban pynlong ïa ka thain ba kan kiew noh ha ki kam pynroi.
Shuh shuh utei u nongïalam ka UDP u la ong ruh ba kum kitei ki jingjia ba sngewsih ha Manipur dei ban pynrem jur da baroh.
“Kum uwei na ki nongshong shnong bad u nongïalam ngi dawa ïa ka jingtuklar jong ka sorkar pdeng bad baroh kito kiba don bynta lang ban wanrah biang ïa ka suk ka saiñ ha Manipur,” u la ong. Ha kajuh ka por u la pynrem jur ruh ïa kito kiba donkti ha katei ka kam riewkhlaw pyrshah ïa ki longkmie bad dawa ba dei ban leh da kaba tyngeh ïa kitei ki kam riewkhlaw.
