Shillong, Naitung 22 : Ka ïing Bishar Supreme Court, ka la pynsangeh (stayed) ïa ka hukum jong u Deputy Commissioner (DC) ka East Jaintia Hills ban pynpra ïa ki karkhana coke, kiba don hapoh ka District.
Ka ïing Bishar ka la pynmih ïa kane ka hukum ha ka 21 tarik Naitung haba shong bishar ïa ka mukotduma ba la mudui da ka DRUK Fuels Limited pyrshah ïa ka Sorkar Jylla bad kiwei kiwei ki kynhun.
Kane ka hukum ka la mih na ka ïing bishar u Justice Surya Kant bad u Justice Dipankar Datta.
Hynrei ka bishar ha ka juh ka por ka la aibor pat ïa u Deputy Commissioner ka East Jaintia Hills ba un khang khyrdep ïa ki karkhana coke ba kin ym treikam satia.
Dang ha ka 12 tarik Naitung, ki bor District ka East Jaintia Hills ki la pynpra ïa 2 tylli ki karkhana coke beaiñ kiba la pynïeng khlem da ïoh ïa ka Concent of Established na ka Meghalaya State Pollution Control Board (MPSCB).
Kine ki artylli ki karkhana coke beaiñ ki kynthup ïa ka M/S Halari Coke Plant kaba don ha Sutnga Elaka, East Jaintia Hills bad ka M/S Shauryansi Coke kaba don ha Wah Samier, Sutnga, East Jaintia Hills.
U Deputy Commissioner ka District u A Baranwal u pyntip ba ïa kine ki karkhana coke la leit ban pynpra da ka kynhun kaba ïalam da u Bah J Shylla, MCS, Additional Deputy Commissioner ha ryngkat ka kynhun ki Pulit na ka Ophis u Superintendent of Police, ka Meghalaya State Pollution Control Board bad ka District Commerce & Industries Centre,
Une u Khliehduh ka District u pyntip ba ïa kane ka sienjam la shim haba pyntreikam ïa ka Office Order No: EJHD/GENL.261/COKE/Pt.IV/2023/151 ba 7 tarik Naitung, 2023 bad ka Order No: EJHD/GENL.261/COKE/Pt.IV/2023/152 ba 11 tarik Naitung, 2023.
U pyntip ba ïa kine ki hukum la pynmih namar ka jingsngew ba kine ki karkhana beaiñ ki lah ban pyrshang treikam sopsop da kaba pyndonkam ïa u dewiong ba mih na ka thaiñ, kaba pynshlur pat ïa ka jingtih dewiong beaiñ hapoh ka District.
