Shillong, Lber 26: Ka North Eastern Hill University Students’ Union (NEHUSU) ka pynrem jur ïa ki briew jong ka RSS bad ABVP ha ryngkat ka jingkynnoh ba ki la thombor ïa u Vice President ka NEHUSU u Samla Easterson Sohtun haka 25 tarik mynta u bnai.
Ka kyrwoh na u secretary ka NEHUSU u samla B Riang ka kdew ba haka por 12:15- 12:45 nohphai sngi ki katto katne ki dkhot ka ABVP bad RSS ki la rung ha phyllaw ka skulbah NEHU da ka ba kam ban lehkmen Holi ban wanrah ka jingïasngew pher jaidbynriew da ka jinglehkmen Holi.
“Ngi dawa na ki bor pynïaid ka NEHU ban pynshai mano ba ai jingbit ïa ki (ABVP bad RSS) ban rung sha phyllaw ka Skulbah. Hadien ba u Vice President ula ïohi ïa kane ka jinglehkmen holi haka por ba u dang leit ïaid lynti ula khot ïa ki nongpahara ban bthah ïa ki samla pule na bar ban mih noh na phyllaw namar ka lah ban wanrah ka jingbym sngew shngaiñ ïa ki samla khynthei kiba lehkmen Holi. Hynrei ha kane ka jingleit kyrpad u vice president ula ngat haka jingshah shoh haki dkhot ka RSS bad ABVP” la ong u samla B Riang.
U samla B Riang ula ïathuh ba ha NEHU la ju rakhe ïa ki jait jinglehkmen kum ka Christmas,Eid, Holi man u snem hynrei ka long kaei kaei sngewsih ba ki kynhun kum ka RSS bad ABVP ki pyrshang ban wanrah ka jingïasngew pher jaidbynriew ka ban ktah ïa ka suk ka saiñ hapoh ka skulbah.
“Ngi naka NEHUSU ngi kyntu ïa ki bor pynïaid ka skulbah ban shim ki sienjam ba tyngeh ïa kino kino kiba shah ïa ki dkhot ka RSS bad ABVP ban rung shapoh ka phyllaw bad kyntu ruh ïa ki bor Pulit ban kem ïa kiba donkti” ula ong.
Ka NEHUSU ka kyntu ruh ïa ki samla Pule ka NEHU ban long kiba peitngor ban nym ngop ha ki kynhun kiba pyrshang ban wanrah ka jingïasngew jaidbynriew da ka jingïa ktah kti.
