Shillong, Jymmang 15: Ka Khasi Jaiñtia Synod Pdeng ka pynpaw ka jingsngewsih halor ka jingshah pyniap jong ki 3 ngut ki Pastor hapoh ka Jylla Manipur bad ka la pynrem ruh ïa kane ka jingjia kaba ka ñiew kum ka jingleh riewkhlaw haba bynrap ba ka jingleh donbor pyrshah ïa ki nongïalam niam ka dei ka jingthombor ïa ka imlang sahlang jong ki briew.”
Ha ka kyrwoh ba ka KJP Synod Pdeng ka pyllait ka la ong “Ngi pynpaw ïa ka jingsngewkhia kaba jur halor ka jingshah pynïap ki mynsiem ba lui lui bad khamtam eh ka jingthombor kaba la shim noh ïa ka jingim jong ki 3 ngut ki Pastor, kata u Pastors Rev Vumthang Sitlhou, General Secretary barim ka Manipur Baptist Convention, Pastor V. Kaigoulun bad Pastor Paogoulen”.
Ka Synod Pdeng ka la ong ba ka la kyndit ban ïoh sngew ïa kane ka khubor shah pyniap ki nongïalam niam. “Haba ngi ïohsngew ïa ki kam shyrkhei ngi la sngew lyngngoh shibun eh halor katei ka jingjia namar ngim lah ban mutdur ba ki jingim jong ki nongïalam niam kiba ïeng na ka bynta ka jingsuk bad jingïatylli ruh kim shym la lait na kane ka kam thombor. Kum ka Synod ngi ïeng lang ha kaba pynrem ïa kum kine ki kam,” ong ka kyrwoh.
Haba shim ïa kane ka kam thombor kum ka kam thombor ïa ka imlang sahlang, ka la bynrap, “Ngi lah ban ong ba ka jingleh donbor ïa ki shakri U Blei bad ïa ka bha miat jong ki briew ka dei ka jingthombor ïa ka imlang sahlang. Ngi pynrem jur ïa kum kane ka jingleh riewkhlaw.”
Haba phah khubor sngewlem sha ka ïing ka sem ki lanot, ka Synod ka la ong, “Ha kum kine ki por bad ki kynta jong ka jingsngewsih, ngi ïeng ryngkat bad kiba ha ïing ha sem jong ki bad ka imlang sahlang jong ka Balang. Ngi don lang haka por ba sngewsih jong phi. Ha kajuh ka por ngi duwai ba U Blei uba donbor halor baroh, un phah ïa U Mynsiem Bakhuid jong U ha kum kane ka por jong ka jingsngewsih kaba khraw.”
Ka kyrwoh ka la ban jur ba ym don shuh kano kano ka daw ban sait khuid ïa kane ka kam thombor, “Ka long kaba shisha ban ong ba ym don ba lah ban mutdur, ne ka daw ban sait khuid halor kane ka kam thombor ïa ki shakri U Blei. To ngin ïohi ïa ki kti pynjem jong U Blei kiba pynrung ïa ka bor ban ym ailad ha ka jingtieng bad jingïapher, hynrei ban ïakynduh ïa ka jingshun da ka jingieid”.
Ka KJP Synod Pdeng ka duwai ruh ban ïoh bor ban ïaleh pyrshah ïa ki jingsniew. “Ngi duwai ba U Blei un pynkhreh ïa phi baroh da ka bor ba kynja Blei khnang ba phin lah ban ïakhun pyrshah ïa ki bor jong ka jingsniew da ka jingngeit bad jingshlur, da ka jingieid bad jingsngewskhem ba ha kaba kut ka jingsuk bad jingkmen kan jop,”.
