Shillong, Naitung 24: Ka jylla Bharatiya Janata Party ka la pynrem jur ia ka jingpyrta ki ki kyntien pynjah burom pyrshah ia u Myntri Rangbahduh ka ri u Narendra Modi ha Khyndailad.
Ha ka kyrwoh, ka seng ka la ong ba ka dur khih jong katei ka jingjia kaba la saphriang bha ha ki rynsan social media kaba pyni ïa ki katto katne ngut ki samla bym dei riewlum kiba pynmih ïa ki jingpyrta pyrshah ïa u Myntri Rangbah.
“Kane ka jingpyrta slogan ka dei ka bym ïahap satia namar ka Sorkar ka la dep pyrshang ban ïakren bad ki samla ba ïakhih ha Delhi bad khatduh kala poi sha ka jingïasngewthuh jingmut bad ki” ong ka kyrwoh.
Ka BJP ka ong ba kum kine ki jingleh ki pynsniew ïa ki lynti kat kum ka synshar paidbah bad ym dei ban pynshlur ïa ka.
