Pynrem jur ïa ka sorkar halor ka jingshah siat ïap 5 ngut ha Mukroh

Jowai, Naiwieng 29: Ka ‘Save Hynñiewtrep Mission’ kiba kynthup ïa ka JSM, HYC, EJNC, CoRP bad HANM mynta ka sngi kila hiar sha nongbah Jowai ban pynlong da ka jingthang tyngshop ïa ki lai ngut ki nongmihkhmat sorkar kata ïa u Himanta Biswa Sarma myntri rangbah ka Assam, u Conrad K. Sangma myntri rangbah ka Meghalaya bad u Amit Shah u myntri ba dei peit ïa ka kam poh ïing jong ka ri.
Kane ka kynhun kum ka dak ban pynpaw ïa ka jingpyrshajur ïa ka sorkar bad ka jingsngewdiaw halor ka jingshah siat ïap ki san ngut ki briew jong ka Meghalaya ha ki pulit Assam bad ki Forest Guard jong ka jylla Assam kaba la jia ha ka 22 tarik mynta u bnai.
Ïa kane ka jingthang tyngshop la pynlong ha stand Umulong hajan thanad ka Jowai Police Station, Iawmusiang, ha kaba ha kane ka janmiet na baroh kitei ki nongialam seng kila pynpaw ka jingpynrem jur ïa ka jingleh donbor jong ki pulit Assam bad pynrem ruh ïa ka jingbymlah ka sorkar Meghalaya ban tehlakam ïa ka jingïakhajia khappud hapdeng ka jylla Meghlaya bad Assam kaba la neh mynta la 50 tylli ki snem.
Shuh shuh na ka liang ki nongïalam seng kila pynrem jur ïa ki pulit bad ïa ka sorkat jylla Meghalaya kiba nud ban ïa shrut tang hapoh ka jylla hynrei sha kiwei pat ki jylla kim nud ne ki long tang ki khawpud bad ïa kane la ïohi ha kine ki jingjia kiba la dep hapoh jylla ki leh ba heh hynrei balei sha khappud kim nud satia, la kynthoh kitei ki nongïalam seng bhalang.
Ïa ka jingïalang la pynïaid da u General Secretary CB ka HYC bah Roy Kupar Synrem, katba na ka liang u General Secretary ka HYC West Jaiñtia u R. Lamare ula ong ba ka jaitbynriew ka mad ïa ka jingsngewsih na ka jingshah siat ïap ki 5 ngut ki nongshong shnong ka Mukroh bad kane ka pynkit ram ïa ki nongïalam sengbhalang na ka bynta ka jaitbynriew. Ula ong kum ka seng ka dawa na ka sorkar ba ka dei ban pynïoh ïa ka hok na ka bynta kitei ki longïing bad kine ki jingjia ki wan jia na ka daw ka jingkheiñ sting jong ka sorkar.
U bah Bandari Ryntathiang President Central Body CORP ha ka jingkren ula buh jingkylli balei ka sorkar haduh mynta kam pat lah ban kem ïa kita ki pulit kiba donkti ha ka kam siat briew ha Mukroh, ula kynthoh ba kane sorkar jylla ïa u briew uba thiah pang ha jingthiah ka leit ban siat ïap katba ïa ki pulit ba siat ïap ïa ki san ngut ha Mukroh kam nud tang ban leit kem. Ha ka juh ka por u kyntu na ka sorkar ban kan pyllait noh mar mar ïa ka result wad kam pulit jong ki samla.
U Sambormi Lyngdoh President ka EJNC ula kynthoh jur ïa u Myntri kam pohïing ka sorkar jylla u ma Lahkmen Rymbui uba la kop ïalede ba u dei u war um tieng ïano ïano, “lada ka long shisha kymta balei un ai order ïa u DGP bad SP ban leit kem mardor ïa ki pulit Assam”.
Katba u bah Lamphrang Kharbani President jong ka seng Hynniewtrep Achik National Movement (HANM) ula pynrem jur ïa ka myntri Rangbah jong ka jylla Assam uba la kam ba ka shnong Mukroh kaba dang hap hapoh ka Assam bad kine ki dei tang ki kam buit tuh jong ka sorkar Assam ban ïoh tuh ïa ki jaka puta jong ka Meghalaya.
Ula kren shai ba ka ‘Save Hynñiewtrep Mission’ ka long kaba la khreh ban ïakhun katkum ki kyndon aiñ namar kum ki paidnongshong shnong ki don ka hok ban ïeng ïaleh ïa ka jaitbynriew bad ka kyndew ka shyiap. Ula ong ba kane ka dei tang ka jingsdang jong ka jingïakhih bad lada ka sorkar ka dang mynthi kim banse ban shim ïa ki lad kiba kham tyngeh nangne shakhmat.
“Lada ka sorkar ka kwah ban wan buh ïa ka Border Out Post (BOP) kumba la pynbna da u Myntri Rangbah mynta ka sngi ka sorkar ka dei ban leh da ka kam ym ban shuh pynbna paidbah, dei ruh ban pyni ïa ka kam da kaba wanrah ïa ki pulit ba biang ki tiat ryngkat u kuli bad ka bor ban siat” ong u bah Roy Kupar Synrem.