Ban kyntiew ïaka kam rep, sam ei ka tnad Basin ïaki symbai jhur sha ka Mawlong Nongtluh bad Umwang IVCS

Nongpoh, Naiwieng 29: Ki artylli ki Integrated Village Cooperative Society kiba kynthup ïaka Mawlong Nongtluh IVCS bad ka Umwang IVCS mynta ka sngi ki la ioh ïaka lad jingiarap na ka tnad treikam jong ka Meghalaya Basin Development Agency, Ri-Bhoi District ha kaba na ka liang jong ka tnad MBDA ka la sam da ki symbai jhur bapher bapher sha kitei ki artylli ki IVCS ha kaba la sam da u bah Mayralborn Syiem MLA ka Nongpoh kum u kongsan haka jingïalang kaba la long ha Nongpoh.
Katei ka jingsam ïaki symbai jhur ka long ban ai mynsiem bad kyntiew ïaka kam rep jong ki nongrep lyngba ki symbai jhur ba kim donkam ban siew pisa, ïa kaba ki hap ban thied haki dor ba rem na ki iew ki hat.
Naka liang ka kong Ridian Syiem dkhot jong ka Mawlong Nongtluh IVCS ka la pynpaw ïaka jingkmen halor kine ki jingkyrkhu bala shimkhia da ka tnad Basin kaba la pyrkhat kyrpang naka bynta ki nongrep bad lyngba kane ka jingai jingïarap ïaki symbai jhur sha ki nongrep ka la long ka jingmyntoi shibun ha kaba ki nongrep ki la lait ban thied ïa kine ki symbai jhur ha kador ka ba rem.
Na ka liang u Bah Marlam Kupar Kharmudai DPM jong ka MBDA u la ong ba na ka liang ka tnad treikam jong ka Basin ki ïaleh kat ba lah ban theh ïaki jingïarap sha ki nongrep khnang ba kan long ka jingmyntoi ïaki briew kiba im daka rep ka riang, bad mynta ka sngi ki la ioh ban ai ïaki symbai jhur bapher bapher sha kine ki artylli ki IVCS khnang ba kine ki dkhot jong ka IVCS kiba dei ki nongrep kin ioh ban rep hadien ba ki la dep ot ïa u kba.
Shuh shuh u la pynsngew ruh ha Ri-Bhoi ki don 4 tylli ki IVCS bad hapoh ka Umling block ki don artylli ki IVCS kata ka Umwang IVCS bad ka Mawlong Nongtluh IVCS, bad ka tnad Basin ka sngew sarong ban pynpaw ba kawei na kine ki IVCS kata ka Umkon IVCS ka wan hakhlieh duh hapoh ka jylla, bad kane ka IVCS kam leh tang ki kam ban kynshew pisa hynrei ka leh ruh bun jait ki kam ban kyrshan bad ban ïarap bad ban ieng hala ki jong ki kjat.