Nongpoh, Naiwieng 29: Na ka jingjia ha Mukroh ba ki 6 ngut ki mynsiem ba kordor ki la duhei ïa la ka jingim ka la ktah ym tang ïa ka shongsuk shongsaiñ ki paidbah hapoh ka jylla, hynrei ki paidbah ha ka jylla mynta ki la hap ruh ban mad wat ïa ka jingkyrduh ïa ka LPG Cylinder kaba ki pyndonkam na ka bynta ban shet ban tiew khamtam ha kajuh ïa beh kam ha kine ki sngi.
Kane ka jingkyrduh LPG Cylinder ka la paw pyrthei ruh ha Ri Bhoi khamtam ha Nongpoh ha kaba ki paidbah ki la hap ban mad ïa ka jingkyrduh ban ioh ïa ki LPG Cylinder ban shet jingshet bad ka daw kaba ki paidbah ki hap ban mad ïa ka jingkyrduh ïa kane ka LPG Cylinder ban shet jingshet ka la ktah hi na ka jingjia kaba la jia ha Mukroh ba ki Kali ba kit ïa kine ki Tyndong lyer ba shet jingshet ki kyntait ban wan sha Meghalaya ba kam don ka jingshngaiñ ha ka leit ka wan lyngba ka surokbah NH-6 ban poi sha ka jylla Meghalaya.
Haba la ioh ban ïa kren bad u nongpynïaid ka Ri Bhoi Gas Agency, u la kubur ba ka don shisha ka jingkyrduh ban ioh ïa ka LPG Cylinder ha Ri Bhoi bad kane ka ktah ruh wat ha rilum Khasi-Jaintia, namar kito ki Kali ba kit ïa kine ki LPG Cynlinder ki kyntait ban wan sha Meghalaya na ka daw ka jingbym shngaiñ ha ka leit ka wan na ka jingjia kaba la ktah na Mukroh ba ki 6 ngut ki mynsiem ba kordor ki la duh ïa ka jingim ha ka jingsiat pathar ki Pulit Assam.
U la ong ruh halor kane ka jingkyrduh LPG Cylinder na ka liang ka Agency bad lyngba ka Association kin sa shim khia bad mynta kumba la wan phai biang ka shongsuk shongsaiñ kin pyrshang ban pynbiang ïa ki LPG Cylinder katkum ka jingdonkam ki paidbah bad ki sngewthuh ruh ba lada duna ki LPG Cylinder kan buh jingeh ïa ki paidbah kiba la shaniah ban shet jingshet lyngba kine ki tyndong lyer shet jingshet bad kum ki Agency kin pyrshang ban leh ïa kabab ha tam ban pynbiang pura katkum ka jingdonkam ki paidbah, ong ki bor pynïaid ka Ri Bhoi Gas Agency.
