Nongpoh, Naiwieng 29: Haba buddien halor ka jinglong jingman ka Jingkieng Dwarksuid ba dang shen ha kine ki snig ba la dap la don ka jingtwa khyndew ha ki bynta jong ka Jingkieng kaba la buh jingma ïa ki paidbah Nongleit nongwan bad na ka liang u Project Director ka National Highway Authority of India, Shillong Zone mynta ka sngi u la pynthikna ba ka NHAI ka la dep ban maramot ïa katei ka bynta ba twa khyndew ha Jingkieng Dwarksuid da kaba ki la tei da ka kynroh ban pynskhem ïa katei ka jingkieng.
Kum ban pynkynmaw, ka jingtwa khyndew ha ki bynta jong ka Jingkieng Dwarksuid kaba la dep ban jia dang shen ka la wan rah jingma ïa ki paidbah ba leit ba wan lyngba katei ka jingkieng kaba synjor bad ka la don ruh ka jingsahkut ki kali ba kit khia ha ka surokbah NH-6 bad Shillong By-pass. Na ka bynta ban shngaiñ ki paidbah ba lei tba wan wat u Deputy Commissioner ka Ri Bhoi, u Arpit Upadhayay u la pynjari ruh da ka section 144 CRPC ban khang pyrshah ïa ki Kali ba kit khia bad tang kito kiba hapoh ka jingkhia kaba 30 metric ton la shah ban leit na katei ka Jingkeing Dwarksuid.
Haba la ioh ban ïa kren bad u Project Director ka NHAI mynta ka sngi lyngba ka telephone, u Anand Singh Chauhan, u la pyntip ba halor katei ka jingtwa khyndew ha Jingkieng Dwarksuid na ka liang ka NHAI ka la dep ban tei biang da ka kynroh ban pynskhem ïa katei ka jingkieng bad halor ka jingïaid ki Kali ki motor pat ka dei ban long beit katkum ka kyndon ba la buh da ka sorkar namar kumba long haduh mynta katei ka jingkieng kam pat shngaiñ katba ym pat lah ban tei da ka Jingkieng ba thymmai.
U la ïathuh ruh tang hadien ba la twa khyndew ka NHAI ka la shim khia ruh mardor ban maramot ïa katei ka bynta ba la twa khyndew hapoh ka Jingkieng Dwarksuid khnang ba kan nym buh jingma ïa ki paidbah ba leit ba wan bad kumjuh ruh ki Kali ki motor kiba ïaid lyngba katei ka Jingkieng Dwarksuid.
Haba kylli pat halor ka Jingkieng ba thymmai ba la sdang ban tei thymmai mynta hajan katei ka Jingkieng Dwarksuid, u Project Director ka NHAI, u Anand Singh Chauhan u la ïathuh ba ka jingpyntrei ïa ka kam ka la dang ïaid shaphrang bad la kumno kumno ruh ïa kane ka Jingkieng ba thymmai yn pyndep noh ban tei tang hapoh 5 lane 6 bnai.
Shuh shuh, na ka bynta ka jingshngaiñ ki paidbah ban ïaid ban ieng lyngba katei ka jingkieng na ka liang ka NHAI ka la shim khia ban buddien halor kane ka jingshna ïa ka jingkieng ba thymmai bad kyrmen skhem ba tang hapoh 6 bnai yn lah noh ban pyndep khang ba kan don ka jingsngaiñ na ka bynta ki paidbah ba leit ba wan namar katei ka Jingkieng Dwarksuid kaba rim la synjor bad dei tang kane ka jingkieng ba thymmai ka ban ai jingshngaiñ na ka bynta ka leit ka wan ki paidbah, u la bynrap.
