Pynpulom noh ki bor pahara ïa ka jingthmu hiar thma ki lehnoh ha Changlang District

Shillong, Risaw 03: Ki bor pahara, ki la pynpulom noh ïa ka jingthmu ban hiarthma kaba heh ha Changlang district jong ka Arunachal Pradesh, ha kaba ki la kem ïa arngut ki briew kiba la suba ba ki dei ki dkhot jong ka United Liberation Front of Asom-Independent (ULFA-I) bad ki la ïoh kurup ïa kawei ka suloi AK-series, uwei u bom improvised explosive device (IED) bad kiwei de ki tiar bad ki kuli.
Katkum ki khubor, la kynnoh ba ka kynhun ba ïatreilang kaba don kumba 20 ngut eiei ki lehnoh kiba dei jong ka ULFA-I bad ka kynhun NSCN (K-YA) ki la thmu ban leit ambush ïa ki bor pahara ha katei ka District.
Kine ki lehnoh ULFA-I kiba la shah kem ki dei kiba la tip kyrteng kum u Sahadev Rai uba khot sin kum u Bappi Asom bad u Siraj Asom uba la khot sin kum u Siraju Alam.
Hadien ka jingkem bad jinglap ïa ki tiar ïaleh, ki shipai Assam Rifles ryngkat ka jingïatreilang bad kiwei pat ki tnad pahara ki la pynlong ïa ka jingkhynra kaba jur ha katei ka thaiñ ban lap ïa kiwei pat kiba la suba ba ki dei ki lehnoh bad ban khanglad ïa kino kino ki jingma kiba lah ban wanrah ïa ka jingma ïa ka jingpahara.