Pynpoi skhim MP u Bah Marbud ha Mawlai

0

Shillong, Nohprah, 30: U Kyrtong ka Seng Congress u Bah Marbud Dkhar da lade hi u la shimkhia ban pynpoi ïa ki Work Order ba la ai da u MP ka Shillong Lok Sabha Constituency u Bah Vincent H. Pala lyngba ka MP Local Area Development sha ki shnong bapher bapher kiba don ha ka jylli jong ka Mawlai Constituency.
Ha ka sngi Thohdieng jong ka taiew baladep u Bah Marbud Dkhar u la leit ban aiti ïa ka Work Order kaba T. 2 lak sha ka Dorbar Shnong Mawlai Iewrynghep ha kaba la sakhi lang da u Rangbah Shnong u Bah H. War, ki Executive Member jong ka shnong, ki nongïalam jong ka Seng Samla, Seng Kynthei bad ki nongshong shnong.
Sa ha ka Lah Sngi u Blei mynta ka taiew, u Bah Marbud u la pynpoi ïa ka MPLAD Scheme ha ka shnong Mawsiatkhnam bad ha ka shnong Mawlai Syllaikariah ha kaba la sakhi lang da u Rangbah Shnong, ki nongkitkam shnong lem bad ki nongshong shnong.
Kum u kyrtong ka Seng Congress uba la pynkhreh bha ïalade ban ai reng ha ka elekshon sha ka Iingdorbar Thawaiñ ka Jylla ka ban sa long ha u snem 2023, u Bah Marbud Dkhar u la pynpaw ïa ka jingsngewkmen ban pynïoh ïa kane ka skhim na u MP ki ban sa long ki jingmyntoi ïa ki nongshong shnong ym tang ïa uwei ne arngut.
U la ai khublei kyrpang ïa u Bah Vincent Pala uba la trei shitom shisha ban wanrah ki skhim pynroi ha ki shnong ki thaw jong ka shnong Mawlai.
U Bah H. War haba ai khublei ïa u Bah Marbud u la ai ka jingïaroh ba kum u samla rangbah uba don ka thong ban ai jingshakri ha ka shnong Mawlai u la trei shitom shisha ban wanrah ïa kane ka skhim ha ka shnong Mawlai Iewrynghep namar wat ha ki 10 snem ba ka Dorbar Shnong ka la pynsngew hynrei ym don satia ba patiaw ïa ki jingeh jong ka shnong.
Ka Shnong Mawlai Iewrynghep ka la kitbok kitrwiang ïa u Bah Marbud Dkhar ba un dup poi sha ka thong khnang ba un dup lah ban trei kham bha na ka bynta ki paidbah ha ka shnong Mawlai.

Leave A Reply

Your email address will not be published.