Shillong, Naiwieng, 06: Ka Sorkar Jylla ka la pynpaw ïa ka jingbym lah ban ai ïa kano kano ka jingkular sha ki Accredited Social Health Activists (ASHA) halor ka nongrim ba ki ïoh ïa ki jingsiew katkum ka kam ba ki trei.
Ki ASHA kiba don hapoh ka shatri jong ka Meghalaya ASHA Workers’ Union (MASHAWU) ki la pynlong da ka jingïakhih, ‘da kaba shong iing” kaba la sdang naduh ka 30 tarik Risaw, ban pynbor ïa ka Sorkar ban pynurlong ïa ka jingdawa jong ki kaba kynthup ruh ïa ka jingpynkiew ïa ka jingsiew bainong.
Hadien ba la wai ka jingïalang ba la khot da u Myntri Rangbah ka Jylla ha ka Lah Sngi U Blei, ka Myntri ka Koit ka Khiah ka Sorkar Jylla ka Dr. Ampareen Lyngdoh ka la ong, “ka sorkar ka sngew hadien ba la bishar sani bha ïa ki (ASHA) jingsiew ki long kiba biang.”
Ka la ong ba ki ASHA ki ïoh ïa ka jingsiew T. 5,000 haduh T. 7,000 manla u bnai ba ki trei ïa ka kam.
Da kaba pynpaw ba ki ASHA kim dei kiba hap hapoh ka jingpeit jingkhmih jong ka Sorkar, ka Dr. Ampareen Lyngdoh ka la ong, “ki ASHA ki dei ki bynta jong ka village health councils (VHC). Ki dei kiba trei hapoh ka jingpeit jong ki Dorbar Shnong, khnang ban pynthikna halor ka jinglum jingtip halor ka koit ka khiah ha ki shnong ki thaw ha kylleng ka jylla Meghalaya.”
Katkum ka jingong jong ka Myntri, ki lada ki ASHA kim pyndep ïa la ka kamram ka jingim jong ki briew ruh ka don jingma khamtam ha ka ïap ka im.
Haba kyrpad ïa ki ASHA ban weng noh ïa ka jingïakhih, ka Myntri ka la ong, “ngi kyrpad ïa ki ASHA ban leit phai biang sha la kam da ka jingïatreilang bad ki dorbar shnng. Ki VHC mynta ki trei ïa ki kam ha ki Subcentres kiba ngi la nang pynkiew dang shen ha ka jylla Meghalaya ba kin long kum ki jingkieng kiba pun ïa ka jingïadei hapdeng ka tnat ka Koit ka Khiah khnang ban ai ïa ka jingshakri kaba paka sha ki paidbah bad ïa ki nongshong shnong ha ka jylla.”
“Kam shong satia ha ka sorkar ban shim rai na ka bynta ban pynkiew jingsiew ïa ki ASHA namarba ki ïoh ïa ki jingsiew kumba long lem ha ka ri baroh kawei,” ka la bynrap.
Ka la kyrpad ruh ïa ki ASHA ba kin ym pynkyllaiñ ïa kane ka kam namarba kaba trei Volunteer kam dei ka nongtrei bapura.
