Jowai, Naiwieng, 06: “Ko Sorkar sngewbha ïarap lem ïa ngi” la pynsngew ki nongtrei jong jong ka JHADC hapoh ka lama jong ka Jaiñtia Hills Autonomous District Council Staff Association, (JHADCSA) Jowai kiba la duh tulop mynta la 9 bnai kynthih kata naduh u Rymphang haduh Risaw 2023.
Ki nongtrei ka JHADC ha ka Lah Sngi u Blei ki la shong kyllaiñ myngngor ha phyllaw jong ka ophis, ryngkat ki lama bad ki sopti rong ïong, kum ka dak ban pynpaw ïa ka jingsngewsih halor ka jingbym shahshkor jong ka Sorkar ïa kane ka jingeh kaba ki ïa kynduh na ka jingbym ïoh tulop kaba la jan kynjoh sha ka shisnem.
“Kum ki nongtrei ngi donkam ban ïoh ka jingsiew kumba long lem kiwei de ki nongtrei hapoh ki tnad sorkar bapher bapher ban ïa im lang naduh ki jingdonkam jong ki khun ki kti, ka jingkoit jingkhiah nalor kiwei” la pynpaw ki nongtrei ka Council da kaba ong ruh ba ka por lehkmen Khristmas bad u snem thymmai ka la jan nalor sa ka bai skul ki khun.
U President ka Seng u Ma Johnson Pohrmen ha ka jingiakren bad ki lad pathai khubor ula ong kane ka jingmih jong ki sa shisien ka long hadien ka jingïakhih kaba ladep pynlong ha ka 4 tarik Risaw 2023, ha kaba ka Sorkar kam shym la siew dep ïa ka tulop jong ki, hynrei la siew tang jong u bnai Nohprah 2022 bad u bnai Kyllalyngkot 2023.
Haduh mynne mynta ym don kino kino ki nongïalam kiba wan ban pyntngen ïa ki nongtrei ka JHADC kiba don hapdeng ka jingkyrduh, namar khlem ka pisa ka jingim ruh ka don ha ka jingpisa lynga, la ong shuh shuh u Ma Pohrmen namar wat ïa ka Arrear kaba ki dei hok ban ïoh kum ki nongtrei ka Council kim pat ïoh satia.
U la kyntu ïa ki 7 ngut ki MLA ka rilum Jaiñtia bad ïa ar ngut ki MP jong ka jylla ba kin ïarap lem ïa kane ka jingeh namar kum ki paidbah kiba la jied ïa ki da ka jingieit bad ma ki ruh ki dei ban don ka jingsngewlem halor kane, da kaba ong ruh ba kane ka jingduh tulop manla ka por ka wan jia la san snem mynta.
Kane ka jingïashong kyllaiñ myngngor jong ki nongtrei ka Council, hynrei la pynsngew ba ki kam ka Council kim shym la dkoh trei kam, namar ki don ki tnad hapoh ka Council kin hap ban pyndep ïa ki kam bakyrkieh kum ka Finance Department.
Ka Association ka ladep ban pynsngew ïa kane ka jingeh sha u Chief Executive Member (CEM) jong ka JHADC manla ka por hynrei kane ka shuh sah kut tang ha ki jingkren kaba la buh pynban ha ka jinglyngngoh khlem don kino kino ki soh ba mih.
Lada kane ka jingïakhih ka long kaba bakla u Ma Johnson Pohrmen ula buh ka jingkylli, la ka don neem kata aiñ kaba la bthah ban bat sah ïa ka tulop ki nongtrei kaba la jan dap da ki bun bun bnai.
Hadien ka jingshong kyllaiñ mynngor ka Association ka la rai ba hadien ka Dorbar Tlang jong ka JHADC ka ban long ha kane ka 9 tarik mynta u bnai lada kim ïoh ïa ka tulop, ka Association kan pynlong da ka jingïakhi bad ïa ka tarik yn sa pyntip hadien.
