Shillong 06, Naiwieng: Watla ka UDP ka don u MDC ba mynta hynrei, la mih uwei u samla ban ïaknieh tiket na Lyngkyrdem-Laitkroh Constituency na bynta elekshon MDC ban sa wan. Katkum ka jingtip, u Bah Dmuising Khongjirem na shnong Wahkhen, uba dei u nongthoh khubor, u la pan tiket na ka UDP ban ïakhun ïa ka elekshon MDC na katei ka konstitwensi.
Ha ka jingshisha, u Bah Ryngkatlang Lyndem u dei u MDC jong ka UDP na katei ka konstitwensi hadien ba ula jop ha 2019. Haba pynthikna halor kane, u Bah Dmuising ula kubur ba ula pan ticket na ka UDP ban ïakhun ïa ka elekshon MDC bad kaba sah, kan shong ha ka rai jong ka party. Haba kylli, kaei ka daw kaba pynlong ïa u ban pan tiket wat haba u don u MDC, u bah Dmuising ula ong ba ha ka synshar paidbah bad ka UDP kaba bud ïa ka nongrim ka synshar paidbah, mano mano ruh lah ban pan ticket kampher wat haba la don u MDC ne MLA. U ong ruh ba ka rai ka shong ha ka party ban bishar ban khan ban thew tarajur ïano ban ai tiket hadien ba la leh ïa ka jingwad jingtip na ki nongïalam, ki nongkyrshan jong ka Constituency.
“Hooid, nga la pan tiket hadien ba la ïasyllok bad kiba bun ki nongïalam ka party. Ka shong mynta ha ka jingstad ki nongïalam ka party, ïano ki idei ban ai tiket,” u la ong. Shuh shuh u ong ruh ba ka jingmih jong u ban pan tiket wat haba la don u MDC, ka don ka daw bad u don kyrmen skhem ba ki nongïalam ka party kin bishar sani.
Ha kajuh ka por, ula ong ba shwa ba un pan tiket, u la ïasyllok bad kiba bun ki nongïalam ka UDP jong ka Lyngkyrdem-Laitkroh Constituency, kiba la ai mynsiem ban ïaid shakhmat.
Lah ban kdew ba u Bah Dmuising u dei u President ka UDP Youth Wing Pynursla circle bad u dei u nongthoh khubor ba la ih bha ha ka jylla.
Dang shen, ka NPP kala rai ban pynïakhun da u pyrsa u Bah Prestone Tynsong u Bah Rahboklang Tynsong, da kaba pynshong noh ïa u MDC barim bah Jansing Tynsong. Katkum ka jingtip ba la ïoh lum, ka Voice of the People Party (VPP), ka lah ban pynïakhun ïa u Bah Shemphang S Rynjah, katba kiwei ki party kum ka Congress, ym pat tip ïano kin pynïakhun.
