Khliehriat nailar 27: U Deputy Commissioner (Supply), East Jaiñtia Hills District, Khliehriat da kane u pyntip paidbah ba ka tnat Central Consumer Protection Authority (CCPA) ka la pynmih ki jingbthah na ka bynta ban khanglad ïa ki kam shim kabu ha ki kam khaïi pateng bad ban aijingiada na ka bynta ki nongthied nongpet (customer) ha ka ba ïadei bad ki rukom treikam hapoh ki hotel bad ki restaurant.
Katkum kane ka jingbthah ba la pynmih da ka CCPA, la khang pyrshah ïa kino kino ki hotel bad ki restaurant ba kin kynthup lang mardor ïa ka service charge lane lyngba ka jingkynthup lang ha ka bill.
La khang pyrshah ban shim pisa lyngba ka jingshakri (Service charge) kaba ki ai na customer lane lyngba kiwei pat ki rukom.La khang pyrshah ïa ki hotel bad restaurant ban pynbor ïa ki customer ban siew ïa ka service charge bad la pyntip shai sha ki customer ba ka service charge ka long da ka mon sngewbha bad ha ka jingsngew lade jong ki customer.
Kam dei ban don ka jingpyrkhing ha ka ba ïadei bad ka jingwan rung lane ban don ki kyndon kiba ïadei bad ka rukom ai jingshakri bala pynshong nongrim na ka bynta ban lum ïa ka bai service charge na ki customer. La khang pyrshah ban lum ïa ka service charge da ka ba kynthup ha ka bill jong ka bam bad ban kynthup ha ka GST ha ka pisa baroh kaba ki siew.
Lada ki customer ki lap ïa ki hotel ne ki restaurant kiba shim ïa ka service charge kaba long pyrshah ïa ki kyndon, ki customer ki lah ban kyntu ïa ki bor ba dei khmih jong ki hotel ne restaurant ba kin weng ïa ka servcie charge na ka bill kaba ki siew.
Kumjuh ruh ki customer ki lah ban ujor sha ka National Consumer Helpline (NCH), da kaba phone sha u nombor 1915 lane lyngba ka NCH mobile app.
Ki customer ki dei ruh ban ujor pyrshah ïa kane ka kam bymman bad ka Consumer Commission.Ia ka jingujor lah ruh ban ujor lyngba ka online da ka ba leit lyngba ka e-daakhil portal www.edaakhil.nic.na ka bynta ban pynkloi ïa ka kam.
Shuh shuh ki customer ki lah ruh ban phah ka jingujor sha ka District Collector na ka bynta ban pynlong ka jingtohkit bad ka ban leit sha ka CCPA.Nalor kata ïa ka jingujor lah ruh ban phah sha ka CCPA lyngba ka e-mail ha com-ccpa@nic.in.
