Mana ka DS Panaliar ban die ïa ki jingdih pynbuaid hapoh u pud u sam ka shnong
50 hajar ka kuna ïa ki nongdie Drug bad 20 hajar ïa ki nongdie kyiad
Jowai, Nailar 27: Ka Dorbar Shnong Panaliar, Jowai ha kane ka sngi thohdieng kala pynbna paidbah ba la khang pyrshah ban die ïa ki kynja jingdih pynbuaid hapoh u pud u sam jong ka shnong, ka shnong kala ong ba ka jingïoh lad ban die ïa kine ki jingdih pynbuaid kala wanrah ïa ki kam sniew kiba ha rukom hapoh ka shnong.
Ban teh lakam ïa kine ki kam sniew ka Shnong hapoh ka jingïalam u Waheh Shnong ma Riquoma Rq. Laloo haba kren sha ki lad pathai khubor ula ong ba ka shnong manla u snem kala pyrshah ban wad ki lad ki lynti ban khanglad ïa kiba bun ki kam sniew kiba ktah ruh ïa ki khun samla jong ka shnong.
Da kawei ka jingmut hadien ka jingïalang jong ka Executive Committee jong ka shnong kala mana tyngeh ba ym bit shuh ban die ïa ki jingdih pynbuaid hapoh ka shnong lene pynpoi ïa ki jingdih pynbuaid lyngba ka online lyngba ki Wine store lada khlem da ïoh jingbit na ka shnong. Lada lap ïa kiba die ka kuna kan long haduh 20 hajar tyngka ïa ki nongdie, katba ïa u nongthied kan long 10 hajar tyngka.
Ban rad diengkhong ïa ka jingkynrei jong u drug hapoh ka shnong la pyntip ruh lada lap ïa ki nongdie drug ka kuna kan long beit haduh 50 hajar tyngka bad ka shnong kam don jingmap satia ïa kiba donkti haka kam die drug.
Halor kane la kyntu ruh ïa ki nongshong shnong lada ki lap ïa kino kino kiba die bad thied kyiad hapoh ka shnong kin ai jingtip mar mar sha ka shnong da kaba buhrieh ïa ka kyrteng jong ki bad yn ai buskit ruh haduh 4 hajar tyngka.
Ban warah kumjuh ïa ka shongsuk shong shngaiñ hapoh shnong la mana ïa ki kali ban shong ha ki jaka ba dum khamtam ha ki por mynmiet kaba pyntieng pynsmiej ïa ki kynthei kynnah bad kaba wanrah ruh ïa ka jingjaboh ïa ka shnong ka thaw. La khang pyrshah ruh ïa ki kali ban ïaid sted hapoh ka shnong
La mana ïa kino kino ki kwah ban pynlong prokram hapoh u pud u sam jong ka shnong, ki deo ban ïoh jingbit shwa na ka shnong bad lada dong kiba ïaidlaid ka shnong ka lah ban leit pynsangeh shi syndon. La pyntip ruh ba ki dukan kiba don hapoh jong ka shnong ki dei ban khang hapoh 10 shiteng mynmiet.
Ïa kine ki jingmana ka Dorbar Shnong ka khot ka jingïatreilang naduh ki VDP shnong, ka seng Khynroo khynlood Committtee, ka sports & Game Committee, ka Women Welfare bad ki nongshong shnong baroh na ka bynta ban wanrah ïa ka bha ka miat.