Pynrem jur ka seng ki nongñiah kali kamai, dawa set patok shi jingim ïa ki riew thrang snam

Jowai, Nailar 26: Ka All Jaiñtia Commercial Vehicle Association kaba dei ka seng jong ki nongkamai kali kaba kynthup haduh 45 tylli ki Association jong ki kali kamai kiba don hapoh Rilum Jaiñtia (East & West Jaiñtia ) ka dap da ka jingsngewsih ka ba khraw ha ka jingïadei bad ka jingshah pynïap jong ki Arngut ki nongñiah kali kamai tang hapoh shi taiew.
Ka seng lyngba u President jong ka u ma Paila kordor Lyngkot ka pynrem jur ïa kine ki riew thrang snam ki ba shim jyndat ïa ka jingim balui lui jong kine ki arngut ki mynsiem ba kordor. Halor kane ka jingshah rahbor bad shah pynïap dusmon jong kine ki nongñiah kali kamai, Ka seng ka kyrpad ïa ki bor ba dei peit ban pynshitom ïa kine ki riew khlaw nong pynïap briew da kaba set phatok ïa ki shi jingim.
Ka seng kan sa pyllong ruh da ka jingïalang paidbah pyrshah ïa kine ki nongpynïap briew ban pynbor ïa ki bor ba dei peit ba kin pynshitom ïa kine ki nongpynïap briew kat kum ki kyndon aiñ bad ban set phatok ïa ki baroh shi rta, namar lada kine ki riew runar kin lait na phatok kan long ka jingma ka ba khraw ym tang ïa ki nongniah kali hynrei wat ïa ki babun ba lang ruh kumjuh.
Ha ka jingïadei bad ka tarik bad ïa jaka pyllong jingïalang yn sa pyntip paidbah ha kine ki khyndiat sngi ki ban wan namar ia kane ka rally pyrshah ia kine ki nongpyniap briew yn ia snohkti lang bad yn ia treilang da baroh ki seng Kamai kali ki ba don ha poh ka Jylla Meghalaya.
Nalor ki 45 tylli ki Association kiba don hapoh ka lama ka All Jaiñtia Commercial Vehicle Association, yn ïa trei lang ruh da ki seng bapher bapher kum Ka Hynniewtrep Taxi Association Shillong, Ka Joint Action Committee Riwar Mihngi Tourist Vehicle, Ka Mawkyrwat Tourist Taxi Drivers & Owner Association, Ka All Shillong Tourist Taxi Drivers & Owners Association, Ka Nongthliew Area Indica Owners & Drivers Association, Ka S.S.T.T.O.D.A, Ka Iatylli Tourist Owners & Drivers Association, Ka Nongstoin Shillong Ertiga Owners & Drivers Association, Ka All Meghalaya Tourist Taxi Welfare Association, Ka Sohiong Area Owners & Drivers Tourist Taxi Cab Association, Ka S.A.T.D.A, Ka Tyrsad Area Tourist Taxi Owners & Drivers Association bad kiwei ki wei ki Association.
Shuh shuh ka seng ka kyrpad ïa ki khun ka bri U Hynñiewtrep kiba don ka jingkitkhlieh na ka bynta ka Ri bad ka Jait bynriew ba kin sngewbha ban ïawan shane ka jingïalang paidbah kaba yn sa pyntip hadien.