Nongstoiñ, Jylliew, 28: Ka seng WKSU ka la dawa ban pynlong noh ïa ki exam DSC kiba dei ki kam kiba lait ha ki tnad bapher jong ka West Khasi Hills District. Halor kane, ka seng ka la pynsngew ruh sha u DC Nongstoiñ bah Garod LSN Dykes, ba ïa ki kam sorkar kiba la pynbna paidbah naduh u snem 2020 dei ban khot interview noh, namar ka la slem palat ka jingthung kam ïa ki samla kiba la dep aplai kam sha ka DSC.
Na ka liang u DC u la kubur ba ïa kitei ki kam kiba lait kiba la pyntip paidbah yn sah khot interview noh mynta u snem hi. U la pynpaw ruh ba ki samla kiba la thep ïa kitei ki kam kiba lait, kim dei ban duh jingkyrmen bad na ka liang ka tnad ba dei khmih kan sa pyntip paidbah ïa ka jingpynlong noh ïa ka District Selection Committee hapoh Nongstoiñ mynta u snem hi.
Ka seng ka ai khublei ïa u DC Nongstoiñ u ba la kular ban shimkhia ïa katei ka mat thung kam thung jam hapoh ka thaiñ, wat lada kam dei ha ka samoi treikam jong u, ong ka kyrwoh na u samla D. Sun President WKSU Central body.
