SHILLONG, ïaïong 06: Ka nongbah Shillong ka la thaw ïa ka histori hadien ba ka North Eastern Hill University (NEHU) ka la pynlong ïa ka Classroom Edition Skate+BMX Jam kaba nyngkong eh, kaba la plie paidbah da u Myntri ka tnad ïalehaki jong ka Sorkar Jylla, u Bah Shakliar Warjri.
ïa kane ka Classroom Edition Skate+BMX Jam kaba la pynlong ha ka sngi Saitjaiñ la pynlong da ka MINUSONE ryngkat ka jingïatreilang bad ka tnad Sports, bad ka NEHU.
Haba ai jingkren ha kane ka sngi na ka liang jong u Myntri ka tnat Sports u la sei ïa ki synboh kyntien ban mynsiem, da kaba pynpaw ba ka thong ba kongsan jong ka Sorkar ka long ban pynbit pynbiang ïa ka rynsan na ka bynta ka jingkiew jong ki khynnah samla. U la ban jur ïa ka jingthmu jong ka Sorkar ban bei tyngka ha ki samla bad ban ai ïa ki ïa ki lad ki lynti kiba bha tam.
U Bah Shakliar u la pynpaw ïa ka jingngeit jong u ba ka jingbei tyngka ha ki kam ïalehkai ka lah ban long ka jingmyntoi kaba khraw ha kaba ïadei bad ka jingtei ïa ka jinglong bad ban pynwan dur ïa ka kam ïalehkai ha ka jylla. U la pynkynmaw biang ïa ka jingangnud jong ka Sorkar ban leh bha, da kaba pynthikna ba kin ai ïa kaba bha tam ban kyrshan ïa ki samla.
Kane ka Classroom Edition Skate+BMX Jam ka la khring ïa palat 70 ngut ki nongïashim bynta na kylleng ka ri India, ba kynthup ïa 45 ngut ki nongñiah na ki jylla bapher bapher jong ka ri India bad 25 ngut ki nongïalehkai trai ri kiba mihkhmat ïa ka jylla Meghalaya.
Katba ka sngi ka nang ïaid, ki nongñiah kiba tbit bad ki nongïalehkai ba dang shu sdang ki la shim ïa ka bynta jong ki, da kaba pyni ïa ki buit bad ka jingtbit ha kane ka jingïakop kaba jur bha.
Kane ka jingïalehkai kaba nyngkong eh ka la pynïasoh lang ïa ki jaitbynriew bapher bapher jong ki samla jong ka Shillong, da kaba rakhe ïa ka jingtbit ha ka jingïalehkai bad ka jingpynpaw pyrthei ïa ka sur jingrwai ba im kaba la sawa ha kylleng ka jaka pule.
