Pynlong ka JAC da ka jingthang mombati ban sngewlem ïa ka samla ba shah pynïap
Ryngkat bad ka jingïaid paidbah ban pynrem ïa u runar ba pynïap ïa ka samla ha Nongpoh

Nongpoh, Nailur 30: Da ki hajar ngut ki paidbah nongshong shnong ka thaiñ Nongpoh ryngkat ki seng bhalang mynta ka sngi ki la pynlong da ka jingïaid paidbah ban rah ïa ki lama iong, ki placard bad ki banner na ka bynta ban pynrem jur halor ka jingshah pynïap ka samla na ka shnong Iewmawlong ha u runar uba dei na ka jaid bynriew Nepali.
Kane ka jingïaid paidbah ka dei kaba la pynlong da ka Joint Action Committee ki saw seng kata ka KSU, RBYF, HNYF bad FKJGP, Nongpoh Circle bad ha kane ka jingïaid paidbah pat la ïa snoh kti lang naduh ka Dorbar shnong Iewmawlong, ki samla, ki longkmie ki longkpa bad kiwei kiwei ki riew rangbah kiba la ai ka jingkyrshan na ka bynta ban pynrem jur ïa u runar uba la nud ban shim im im peit peit ïa ka jingim ka samla kaba la jia ha ka 26 tarik u Nailur 2022 ha ka Shnong Pahamsyiem.
La ai mynsiem ruh ïa ki nongïalam kitei ki saw seng ban pynlong ïa kane ka jingïaid paidbah da ka jindon ryngkat lang ki nongïalam ba hakhmat jong ki ba kynthup ïa u Samla Ferdynald Kharkamni, President ka KSU, North Khasi Hills District Unit, u Bah Marcus Marten, President ka HNYF, Northern Region, u Bah P.P Kylla, Finance secretary ka RBYF Sengkmie, bad kynthup ruh ki riew rangah kum u Bah C.B Syiem, ki Principal bad ki khynah skul na Alpha English Higher Secondary School bad na Ri Bhoi College.
Lyngba jong kane ka sngi, nalor ka jingïaid paidbah ban rah ïa ki lama iong bad ki jingthoh ban pynrem ïa u runar ba shim ïa ka jingim ka samla, la pynlong ruh da ka jingthang Mombati kum ka jingsngewlem ïa katei ka samla kaba la duh noh ïa la ka jingim klem dei por ryngkat ki jingduwai na ka bynta ka mynsiem jong kane ka samla.
La ai jingkren ruh ha kane ka sngi da ki nongïalam kitei ki seng, ki Longkmie bad ki riew rangbah kiba la pynrem jur ïa utei u runar bad dawa ruh ba dei ban pynshitom bad wat lada dei ban sdien phasi lane set phatok shi jingim kum ka bainong halor kitei ki kam runar kiba u la shim ïa ka jingim katei ka samla.
Shuh shuh, ki la kren ruh ba ki paidbah ki dei ban sngewthuh ban shemphang nangne shakhmat ba kum ki paradoh ki parasnam ba kin long kita kaba peitngor bad ban don ka jingïatylli hapdeng ki para jaid bynriew, namar kum kine ki kam shah thombor bad shah shim jingim ki paradoh ki parasnam ka long ka kam kaba ym lah ban pdiang bad kaba ktah mationg ïa ri bad ka jaid bynriew.