Nongpoh, Nohprah 01 : Ka NYRO Nongjri Mission kala rah syndon ïaka nam lahduh haka lympung ïalehkai phutbol bala pynlong da ka Sohliya Sports Club, hadien ba kala lah ban pynliem noh ïaka Dinova FC Marngar haka jingïakhun phainal bala long mynta ka 1 tarik Nohprah ha madan ïalehkai jong ka shnong Sohliya.
Ïa katei ka lympung la wan ban pynhap pyrda noh da u Bah Jason S Mawlong MLA ka Umsning kum u kongsan haka jingdonlang ki nongïalam ka Sohliya Sport Club naduh u Samla Andrew Muktih President, Lambanroi Lyngkhoi Secretary bad kiwei kiwei ki riew rangbah.
Haba phai sha ka jingïakhun phainal ha katei ka sngi hapdeng ka NYRO Nongjri Mission pyrshah ïaka Dinova FC Marngar, ka jingïakhun ka long kaba itynnad ha kaba baroh 2 tylli ki kynhun kila pyni ïala ka jong ka sap ka phong naka bynta ban khur ïaka nam jop ha katei ka lympung, hynrei hapdeng ka jingïakhun ba jur ba NYRO Nongjri Mission kala lah ban pynliem noh ïaka Dinova FC Marngar da 3-1 kol ban rah syndon ïaka nam lahduh jong katei ka lympung.
La sam ruh ïaki khusnam ha katei ka sngi ha kaba ka NYRO Nongjri Mission kala ioh ban rah ïaka song pisa kaba 30 hajar lem bad ka trophy katba ka Dinova FC Marngar kala ioh ban khur ïaka song pisa kaba 15 hajar lem bad ka trophy.
