Jam ka Shillong Lajong sha ka Quarter Final hadien ba jop ïa ka Ñiaw Wasa FC

0

Nongstoiñ, Nohprah 01 : Ka kynhun ïalehkai jong ka Shillong Lajong FC ka la jam sha ka quarter final jong ka Invitation Knockout Football Tournament 2022-23, ba la pynïaid da ka New Nongstoiñ Sports Social and Cultural Club ha madan New Nongstoiñ.
Ka jingïoh ruh jong ka SLFC sha katei ka wat, ka la jia long hadien ba ka la lah ban jop noh da lai kol la nod pyrshah ïa ka Ñiaw Wasa FC, ha ka jingïalehkai pre quarter final kaba la long hynne ka sngi ha madan New Nongstoiñ.
Ki paidbah kiba la sakhi ïa kane ka jingïalehkai, ki la ïohi ïa ka jingtbit jong ki arliang mamla ban ïalehkai hapdeng madan bad bunsien ki la ïoh ruh ïa ki kabu ban thep kol. Hynrei, ka SLFC kaba don ha ka ïa ka bok ka nusip, ka la ïoh ban thep shwa ïa ka kol kaba nyngkong ha ka kylla step, kaba la long ruh kum ka kol kaba la ai mynsiem ïa ka kynhun baroh kawei.
Haba wan ban bteng ïa ka kylla miet, ka SLFC ka la nang kham ïalehkai bha shuh shuh bad thep ruh sa ïa ki ar tylli ki kol kiba pynskhem ïa ka kynhun, ban nang jam ha kane ka lympung ha Nongstoiñ. Ha kawei ka liang, ka Ñiaw Wasa FC ruh ka la ïoh lem ki katto katne ki kabu ha ka kylla miet ban ïoh thep kol, pynban imat mynta ka kynti ka nusip kam shym la don bad ka kynhun baroh kawei. Kumta baroh ki kabu ki shu lehnohei lut.
Ha kane ka jingïalehkai, ïa ka khusnam rang ïalehkai ba kynsai la ïoh da u Abhay jong ka SLFC. Nangta, ka jingïalehkai ka ban long ha ka 9 tarik ha ka por 1:30 nohphai sngi, kan long hapdeng ka Kith United FC na Nongstoiñ pyrshah ïa ka Kumar Himalaya Sporting Club na Sikkim.

Leave A Reply

Your email address will not be published.