Ka jingnang jan ka elekshon jied nongmihkhmat thymmai teng teng ka pynisammut haba iohi ia ka jingshongshit kynsan ki nongialam jong ki party bapher bapher ban leit khroh leit pynbiej ia ki paidbah man ka san snem. Kaba kham i thamula ka long eh ia kito ki nongialam kiba ha ki san snem ba la dep ki la wan ban bein wan khoh ia kiwei ki party da kaba kynnoh harukom hynrei hynrei mynta pat baroh baroh shu kylla khongpong lut leit ban ïasoh bad kato ka party ba ki bein ki khoh baroh shi katta.
Kaba kham i thamula ka long ba kijuh ki briew kiba bein ba khoh ia ka party (A) ha ki san snem mynshwa ne shwa ka elekshon 2018 mynta pat rdin ki snoh lang ryngkat ka jingiaroh ba katei ka party ka long kaba treikam bha kaba pyrkhat ia ka Jaidbynriew, ia ka lawei jong ki samla, ia ka ïoh ka kot bad ka khih ka kamai jong ki nongshong shnong.
Kumba ïohi mynta lei lei i kumba ki party riewlum ki la shah ktah jur hadien ba bun na ki MLA jong ki ki la shah kthong ne lah ban ong ba ki leit ban kyrshan noh ia ki party ba kham heh. Kumba long mynta lei lei ka party riewlum kaba dang kham skhem dei sa tang ka United Democratic Party namar bun ki party riewlum la ka long naduh ka PDF kaba don saw ngut ki MLA ka sah mynta sa tang arngut hadien ba arngut ki la jied ban kynthih noh sha kawei pat ka party kaba kham heh ha shwa ka elekshon 2023. Kawei pat ka party kaba ngat lang ha kane ka apot kadei ka HSPDP. Kane ka party kaba don tang arngut ki MLA mynta kam don shuh wat tang uwei ruh u MLA hadien ba baroh arngut ki la rai ban leit iakhun noh na kiwei ki party. Uwei na ki u la pynkhreh ban leit iakhun na ka NPP bad uwei pat u la pyntikna ban iakhun na ka UDP.
Ka jingsdang jong kine ki jingiaphet bad ka jingiakynthih na kawei ka party sha kawei pat ka sdang nyngkong eh na Ranikor hadien ba u MLA jong ka Congress u la mih bad pyniasoh sha ka NPP hynrei ha ka elekshon shiteng samoi pat watla u iapein bad ka Civil Sub Division pynban u la shah rem noh ha u kyrtong ka UDP. Dei nangtei ter ter la sdang pat sa ki 12 ngut ki MLA jong ka Congress kiba la leit ban py ïasoh noh sha ka Trinamool Congress hapoh ka jingialam Jong u Dr Mukul Sangma. Hangne ruh ka drama kam pat kut namar ki san ngut kiwei pat ki MLA jong ka Congress kiba dang sah ki ruh ki la sdang ban wad jaka. Kitei ki san ngut ki la krih lang la ka jong ka jong. Don kiba rai ban leit sha ka UDP ba kynthup ia u MLA ka Nongpoh bad u MLA ka Mawlai katba lai ngut kiwei pat ba kynthup ia u MLA ka Shillong West, MLA ka Rambrai bad ruh ka MLA jong ka Shillong East ki pynkhreh mynta ban iakhun na ka NPP.
La nang kulmar ka sainpyrthei hadien ba ki MLA ba phet na ka Trinamool Congress ki la sdang ban kynthih sa sha kiwei pat ki party la ka long sha ka BJP lane wat sha ka UDP ruh. Ym lah ban tip ruh ioh dang don ki MLA na kiwei pat ki party kiba lah ban phet lang sha kiwei pat ki party. Dang shen la ïohi ba wat ki MLA Ka NPP ruh ki la wad jaka na ka BJP ban iakhun ha ka elekshon bad wan.
Kumta na kaei kaba ïohi mynta ka long ba jan 25 ngut ei ei ki MLA ki ieh noh ia la ki jong ki party ban leit iakhun noh na ka party thymmai.
