Rakhe ka ophis DLSA bad ka DM&HO ïa ka ‘World Aids Day’ ha South West Khasi Hills

Mawkyrwat, Nohprah, 01: Kum shibynta jong ka jingïasnohkti lang bad ka pyrthei ha ka jingrakhe ïa ka ‘World Aids Day’, ka ophis jong ka District Legal Services Authority (DLSA) jong ka South West Khasi Hills District ha ryngkat ka jingïatreilang bad ka ophis jong u District Medical & Health Officer (DM&HO) South West Khasi Hills District mynta ka sngi ka la ïoh ban rakhe ïa sngi ba kyrpang hapoh ka Sngap Syiem College, Mawkyrwat, South West Khasi Hills District.
Haba kren ha ka jingïalang, u Dr. Archeloster Lyngdoh, Senior Medical & Health Officer, Mawkyrwat CHC ula kren shaphang kaba ïa dei bad ka jingpang ‘ñiangkulia ne HIV/AIDS ha kaba kumno ban ïada, ban leh ïa ki test bad kumjuh ruh kumno ban sumar ïa ki briew kiba ïoh ïa une u jingpang. U la batai ruh ba une u khñiang jingpang um dei ba u pur na uwei u briew sha uwei pat tang na ka daw jong ka jingïakdup, ïashonglang, ïa bam ja lang hynrei u pur lyngba ka jingïathiah lok khlem jingïada na u ne ka ba la don lypa ïa une u khñiang jingpang, da kaba ïa pyndonkam lang ïa u juh u nar injek bad da kaba ai ne shim snam na ki briew kiba la don lypa ïa une u khñiang jingpang.
Kumta ban lait na kine, ula kyntu ba kum ki samla ki dei ban long kiba stad bad long kiba phikir bha shwa ban leh ïa kiei kiei kum kaba ai snam ba kim dei ban shu leh kulmar.
Ka kong D. Sohtun, MJS, Chief Judicial Magistrate-cum-Secretary jong ka District Legal Services Authority (DLSA), South West Khasi Hills District ka la kren halor ki lad jingïada bad kumno ban tehlakam ïa ki ba ïoh ïa une u khñiang jingpang hapoh ka kyndon aiñ ne ka Human Immunodeficiency Virus (HIV) and Acquired Immune Deficiency Syndrome (AIDS) Prevention and Control Act, 2017 ba ki briew kiba don ïa une u khñiang jingpang kim dei ban shah i-beiñ ne shah ñiew beiñ ha ka imlang ka sahlang ne wat ha kiba ha ïing ha sem.
Ka la ïathuh ruh ba katkum ka aiñ, kito ki briew ba ïoh jingpang HIV/AIDS kim dei ban shah peit ‘matdong ne kyntait ha ka imlang sahlang namar ka jingpang kam dei kaba ïabit kulmar lada ngi long ki briew kiba phikir. “Lada don kiba ñiew shilliang, ïa kum kine kin shah pynshitom da kaba shah set patok bad shah daiñ kuna”, ong ka kong D. Sohtun.
Ha kajuh ka por ka la ïathuh ïa ki katto katne ki kyndon aiñ ba ki samla pule kin tip kumno ba leh lada don kiba pang ‘ñiangkulia ne HIV/AIDs bad kiei ki lad ba kin leh haba ki lap bad shem ïa kim kine ki briew. Namarkata, ka la kyntu ïa ki samla pule ba ha kum kine ki sngi ki dei ban long kiba phikir ïa la ka jong ka jingim da kaba ki long adkar ha kiei kiei khnang ba kin lait na kine.
Kiba la wan ïashimbynta ha kane ka jingrakhe ki long naduh ki samla pule lem bad ki nonghikai jong ka Sngap Syiem College, Mawkyrwat.
Ban pynsngewthuh shuh shuh ïa ki samla pule la ïoh ruh ban ïa phylliew jingmut bad kumjuh ruh ha kaba la pyni ïa kawei ka phlim kaba kyrteng ka “Nangno ka jingïarap kan wan”.
U Principal jong ka Sngap Syiem College, Mawkyrwat, Dr. K.K. Nongsiej u la ai ka jingkren pdiang sngewbha katba ka Ms. Darisha Lyngdoh ka nonghikai jong ka Sngap Syiem College, Mawkyrwat ka la ai ka jingkren khublei.