Mawthadraishan, Nohprah, 1: Ka FKJGP Mawthad-raishan Circle kawei na ka seng kaba peit ïa ka bha ka miat ka dong ka thaiñ hapoh ka jylla, ka la ïoh ka jingujor na ki nongri jingri ka dong ka thaiñ ba ka jingdon ka Dr. Veterinary hapoh Mawthadraishan Block, ka long leh noh ei, namar ka Doctor kaba don hangne kam da nang bha ban kren ktien Khasi, kaba long ka jingeh kaba khraw ïa ki paidbah ban ïa kren, namar bun hi na ki nongrep bad ri jingri kim sngewthuh ne nang ban kren phareng.
Nalor nangta la lap ba ha kane ka tnad kaba don ha Nongshillong, la lap ba lada pan dawai ruh ym ju ïoh, ha kaba kane ka long ka jingdkoh kaba jur kum ka tnad baroh kawei. Na ka liang ka FKJGP ha ka jingïalam u President Samla Firstborn John Marngar ryngkat ki dkhot ka seng, lem bad ki nongïalam ka FKJGP West Khasi Hills District, ka la ïoh ban pynsngew ha ka office treikam jong ka Animal Husbandry and Veterinary officer Nongstoiñ, ban buh noh da kiwei ki Doctor.
Ka seng ka la pynpaw shai ba lada long kaba lah, kan bha ban wanrah bad thung hi da ki Doctor kiba lah ban kren bad sngewthuh ban ïakren bad ki nongri jingri, khnang ba kan long kaba pynsuk ïa ki lada ki donkam ha kano kano ka por bad lada ki ai ïa ki kynja jingpynshai paidbah ruh kan pynsuk ïa ki paidbah ban sngewthuh.
Ka officer incharge, ka la ïathuh ba na ka liang ka sorkar kam pat buh haduh mynta ïa u Assistant Veterinary staff ban ïarap ïa I Doctor incharge hapoh ka Block haduh mynta. Kumta na ka liang jong ka seng ka kyrpad jur ba ka sorkar kan shimkhia halor kane.
