Shillong, Rymphang 23 : Ka Nongdawah CC bad ka Cricket Lovers ki la khur jingjop ha ka jingïalehkai cricket 2nd Disrict League T20 Cricket Tournament 2023 ba la pynïaid da ka East Khasi Hills Cricket Association ha ka jingïalehkai ha ka sngi Palei.
Ka Nongdawah CC ka la khur jingjop da kaba pynliem da 85 ron ïa ka Thynroit SCC katba ka Cricket Lovers SCC ka la pynliem da 6 wicket pyrshah ïa ka Hurdles CC.
Ha ka jingïalehkai kaba nyngkong, ka Nongdawah CC kaba la jop ïa ka jingkynting pisa ka la kam trai ban tied nyngkong ha kaba ka la kamai 122 ron duh noh 7 wicket ha baroh ki 20 over. U Bhaboklang Nongpluh u kamai 35 ron na ki 39 bol bad u Osric Herbert Wanswett u khur 3 wicket ai kamai 9 ron ha ki 4 over na ka bynta ka Thynroit.
Haba wan beh ïa katei ka ron, ka Thynroit SCC kam lah ban tied ïa ki bol jong ka Nongdawah ha kaba ka kamai tang 37 ron khyllem noh 10 wicket ha ki 13.0 over bad dei tang u Zent Avesta Kharmalki uba kamai bun ron da 12 ron na ki 2o bol katba u Kyrmenskhem Nongpluh marwei u khur 6 wicket ai kamai tang 3 ron ha ki 3 over uba la khur ruh ïa ka khusnam Player of the Match.
Haba phai sha ka jingïalehkai kaba ar, ka Hurdles CC kaba la jop ïa ka jingkynting pisa ka la kam trai ban tied nyngkong bad kamai 113 ron duh noh 7 wicket ha baroh ki 20 over ha kaba u Ricky Stone Nongbet u kamai 29 ron na ki 26 bol bad u Prem Lama u ïoh 2 wicket ai kamai 13 ron ha ki 4 over.
Ka Cricket Lovers haba wan beh ïa katei ka thong ka la lah ban pyndep tang ha ki 18.2 over da kaba kamai 114 ron duh tang 4 wicket, u Mukhramul H Sarkar u kamai 23 ron na ki 27 bol bad u Nangkiewkupar Disiar u khur 2 wicket ai kamai 13 ron na ki 3.2 over. Ïa ka nam Player Of the Match la ïoh da u Prem Lama jong ka Cricket Lovers uba ïoh ban khur 2 wicket.
