Pynliem ka India ïa ka Maldives da 3 kol, ïoh pynkhihjar u Chhetri

Shillong, Lber 19: Ka kynhun ïalehkai phutbol shynrang jong ka ri India ka la pynskhem ïa ka iktiar jong ka da kaba pynliem ïa ka Maldives da 3-0 kol ha ka jingïalehkai paralok jong ka FIFA (International friendly) ha JN Stadium, Polo-Shillong, ha ka janmiet jong ka sngi Balang.
Kane ka dei ka sien kaba nyngkong eh ïa ka Shillong ban ïoh pynlong ïa ki jingïalehkai phutbol bar ri, kaba pyni ïa ka jingkiew ka jylla ha kaba ïadei bad ki jingtei bad ka jingkyrshan ba radbah jong ki nongkyrshan.
U Sunil Chhetri u la ïoh ban pynkhihjar ha ka jingwanphai jong u naba shongthait katba u Manolo Marquez u la ïoh ïa ka jingjop kaba nyngkong kum u coach jong ka kynhun ïalehkai phutbol ka ri India bad ka kynhun ka la ïoh ïa ka jingjop kaba nyngkong eh ha ki 489 sngi. Ar tylli ki kol ba la thep tiak da ka khlieh da u Rahul Bheke bad u Liston Colaco ka la buh ïa ka India ha ka jingkyrmen ban jop katba u khlur ïalehkai bna nam jong ka ri, u Chhetri u la thep ïa ka kol kaba 95 ha ka jingwanphai biang jong u sha ka kynhun ïalehkai ka ri.
Kiba la don ryngkat ha kane ka sngi ki long katto katne ngut ki riew pawkhmat, ba kynthup ïa u Myntri ka tnat ïalehkai u Bah Shakliar Warjri, bad u President ka Meghalaya Football Association u Bah Hamletson Dohling, kiba la ai khublei ïa ki nongïalehkai bad ki nongpynïaid ïa ka jingïalehkai shuwa ban sdang ka jingïalehkai.
Kane ka jingïakhun ka paw ba ka long kaba paka ïa ka jingpynkhreh jong ka India shuwa ba kan ïakhun ha ka 2027 AFC Asian Cup Qualifier pyrshah ïa ka Bangladesh, ha ka 25 tarik mynta u Lber, ka ban long ha kajuh ka madan. Katba ka Maldives pat ka pyndonkam ïa kane ka jingïakhun kum ka jingpynkhreh na ka bynta ka jingïakhun pyrshah ïa ka Philippines, kaba long ruh ha ka 25 tarik Lber.
Kane ka dei ka jingïakynduh kaba 19 hapdeng kine ki arliang mamla, ha kaba ka jingjop jong ka India mynta ka la long kaba 13. Ka Maldives ruh ka la jop lai sien, ha kaba ki lai tylli ki jingïakhun ki la kut ha ka jingïakhaid. Ka sien ba khatduh ba kine ki arliang ki ïakynduh ka dei ha u snem 2021, ha kaba ka India ka la jop da 3-1 kol ha ka SAFF Championship.
Ka India ka la ïoh ban thep ïa ka kol ba nyngkong ha ka kylla step, da u Bheke (34’min) uba la kynthih shalor hapoh phyllaw kol ban pyndei tiak da ka khlieh ïa ka bol ba la pashat da u Brandon Fernandes.
Hynrei kaba sngewsih ka long ba u Brandon u la mynsaw jur ha ka kylla miet, ha kaba u la hap ban shah kit ha ka stretcher bad mynta u don ha ka jingartatien na ka bynta ka jingïalehkai pyrshah ïa ka Bangladesh.
Ha ka kylla miet, u Mahesh Singh u la pashat thikna ïa ka bol na ka corner kick kaba u Liston (66’min) u la thep tiak da ka khlieh ban pynjlan da ar kol na bynta ka India. Ka kol kaba lai ka la bud thik hadien 10 minit, da ka jingtrei borbah jong u Mahesh ban pynrung ïa ka bol hapdeng, kaba hadien nangta la pashat da u Liston sha u Chhetri ban pynkhih jlang sha kol.
Ka jingap khmihlynti ha JN Stadium, ban pynlong ïa ka jingïalehkai bar ri jong ki kynhun ba la rangbah ha ka sien kaba nyngkong, ka la paw shai naduh kaba sdang namar ba u rangïalehkai ba pawnam u Chhetri u la wanphai biang sha ka kynhun ïalehkai ka ri hadien 286 sngi ban ïalehkai ïa ka jingïalehkai kaba 152 na bynta ka ri.
Ha ka 82 minit, u Manolo u la rai ban pynshong noh ïa utei u snar thep da kaba wanrah bujli da u Irfan Yadwad. Ka India ka la ïalehkai ïa ka jingïalehkai kaba sah ryngkat ki 3 kol ba pynskhem ïa ka jingjop.