Pynkynmaw ka KSU ïa ka MCAB ban plie thymmai 2 tylli ki tnad treikam ha South West bad 2 tylli ha Mawsynram

Mawkyrwat, Risaw 04: Ka Khasi Student’s Union (KSU) jong ka South West Khasi Hills District ka la phah jingthoh bad ïa kynduh ïa u Managing Director jong ka Meghalaya Cooperative Apex Bank kata ïa u bah Osmond Nongbri ban pynkynmaw biang ïa ka jingdonkam ban plie tnad treikam thymmai ha ki saw tylli ki jaka kata ha Ranikor, Umdohlun ne Wahkaji, Dangar bad Pongkung.
Kum ban shu pynkynmaw, ka KSU lai snem tam mynshwa kata ha u bnai Jylliew jong u snem 2020 ka la ïa kynduh teng ïa ki bor ba dei peit kane ka Bank ban plie tnad treikam thymmai ha kine ki 4 jaka hynrei haba ki ïohi ba kam pat shym la poi shaei shaei, kumta na ka liang ka seng mynta ka kynti ka la hap ban leit pynkynmaw biang ïa kine ki mat ba donkam jong u paidbah.
Kumba la tip ka thañn Ranikor ka don ha ka palat 150 tylli ki shnong hynrei kaba sngewsih ka long ka don tang kawei ka tnad treikam jong ka SBI ha kaba kum ka seng ka la ju lap ba kane ka Bank kam lah shuh ban pynbiang ïa ka jingdonkam kaba man ka por kaba la wanrah ïa ka jingïathynñian jong ki paidbah jan man ka sngi. Kumta ka seng ka sngew namarkata ba ka la donkam ïa ka Apex Bank ban buh noh ïa ka Branch hapoh Ranikor.
Haba phai sha ka thaiñ Umdohlun bad Wahkaji pat, ki don jan palat ïa ki 44 tylli ki shnong bad kane ka thaiñ haduh mynta kam pat don Bank bad ki paidbah ka thaiñ ki hap shong kali 2 – 3 kynta ban poi sha Mawkyrwat ne ïaid kjat 3 haduh 4 kynta ban poi sha Ranikor na ka bynta ban thep, sei pisa ne leit donkam ha ki Bank. Namarkata, ka seng ka kyntu ba dei ban buh noh kawei ka tnad treikam jong ka Apex Bank ha Wahkaji lane Umdohlun khnang ba ki paidbah kin nym shem jingeh shuh nangne shakhmat.
Ka seng ha kane ka jingthoh bad ha ka jingïakynduh ïa u Managing Director ka Meghalaya Cooperative Apex Bank ka la ban jur ruh ban buh tnad thymmai sa ha ki 2 tylli ki jaka ka Mawsynram Block kata ha Dangar bad ha Pongkung khnang ba ki paidbah kin nym shem jingeh shuh haba ki donkam ban pyndep ïa ki kam jongki Bank.
Ha kawei pat ka liang, ka seng ka sngewdei ban kyntu namarkata, ïa ki Nongmihkhmat jong ka Ranikor Constituency, Mawkyrwat Constituency bad Mawsynram Constituency ba kin peit lem ïa ki jingeh kiba kum kine ïa kiba ki paidbah ki ju ïakynduh na ka por sha ka por bad ka kyntu ruh ïa ka sorkar ba kan phai khmat lem sha kine ki thaiñ da kaba buh noh ïa ki tnad treikam kiba pura jong ki Bank khnang ban weng ïa ki jingeh jong ki paidbah.
Ïa ka kynhun ban leit ïakynduh la ïalam da u Forwardman Nongrem, President jong ka Khasi Student’s Union (KSU) jong ka South West Khasi Hills District bad u Pulljohn Wanniang, Organising Secretary jong ka Khasi Student’s Union (KSU) jong ka South West Khasi Hills District bad kiwei kiwei ki nongïalam ka Seng.