Sdang ka ICAR ïa ka jingïamir jingmut ba 2 sngi ban kyntiew ïa ki kam rep bad ri jingri

Shillong, Risaw 04 : Ka National Symposium ne ka jingïamir jingmut kaba Ar sngi halor ka mat “Strategies for promotion of incubatee in Agriculture and Allied Sectors in the Northeastern Region of India” la plie mynta ka sngi Balang da u Dr. Ch. Srinivasa Rao, Director, ICAR-National Academy of Agricultural Research Management, Hyderabad.
ïa kane ka national symposium la pynlong da ka Agri-Bussiness Incubation Centre jong ka ICAR Research Complex na ka bynta ka thaiñ shatei lam mihngi ka ri.
Haba kren ha ka jingïalang u Dr Ch Srinivasa Rao ula ong ba kane ka jingïalang kaba ar sngi kan ïarap ha ka ban lum lang ïa baroh kiba don bynta naduh ki Nongwad Bniah, ki nongthaw polisi, Incubator, agripreneurs, startups, ki karkhana kiba ïadei bad ka rep ka riang, ki nong bei tyngka, ki kompani, ki samla pule bad kiwei kiwei na kylleng ka ri ba kin ïadon lang bad ban sam ïa ki jingtip ïa ki kam kiba ki la sdang thymmai, ki jingpynsngew, ki jingshemphang ha ka kam khaïi pateng ha kaba ïadei bad ka rep ka riang.
Ula ban jur ba ki nongrep kiba dang samla jong kane ka juk kaba mynta kim dei ban long ki nongwad kam hynrei ki dei ban long ki nongaikam ïa kiwei pat bad u ong, ba ka por ka la dei mynta ban ïoh synshar ïa ka ïew ka hat ha kylleng ka pyrthei. Halor kane ka bynta, u kyrmen skhem ba ka thaiñ shatei lam mihngi ka don ïa ka kabu kaba biang bha namar ka jingdon ïa ki mar kiba khampher bad phylla na kiwei pat.
Haba batai shaphang ka jingtreikam jong ka Institute, u Dr. V.K. Mishra, Director jong ka ICAR-RC-NEH, Umiam ula ong ba kane ka jingïalang kan ïarap ha ka ban ai ïa ki jingbatai kiba bniah ïa baroh kiba don bynta, ki karkhana bad ki nongbei tyngka halor ki lad ki lynti ban kyntiew ïa ka rep ka riang ha ka jylla, ka lad ban khaïi bad ki bynta kiba lah ban bei tyngka. Kan long ruh ka rynsan ïa ki kynhun ka ri ha ka bam ka dih, ka rep ka riang, ka kam ri jingri, ki syntiew ki skud, ka kam khaïi ha ka rep ka riang bad ka jingkyntiew ïa ka thaiñ nongkyndong da kaba pynïasoh bad ïatreilang ban thaw ïa ki polisi treikam.
Haba batai shaphang ka Agri-Business Incubation Centre, u Dr. B.P. Singh, Head Division of Technology Assessment and Capacity Building (DTAC), ula ong ba u Myntri Rangbahduh ka ri, u kwah ba ki trai shnong kin mih shakhmat bad ba kin pynïaid ïew ïa ki mar ha kylleng ka pyrthei bad ka kam khaïï pateng ha ka rep ka riang ka don ïa ka bynta kaba khraw bha ban kyntiew ïa ka ïoh ka kot jong ki nongrep bad ïa ka ri baroh kawei.
U Dr. A.K.Mohanty, Director, ATARI, Umiam ula ong, ba ki nongrep ki dei ban don ïa ka jingmut jingpyrkhat kum ki nongkhaïi ha kane ka juk kaba mynta bad ula pynpaw ba dei ban pynlong ïa ka jingwad bniah ha kata ka lynti katkum ka jingdonkam jong ki karkhana.
Katba u Dr. G. Kadirvel, Director, ATARI Guwahati, ula ong ba jinglut jingsep ha ka jingpynmih bad ka jingdawa ha ki ïew ki hat kad ei ban buh jingmut bha ha ka jingpynkhreh ïa kano kano ka projek.
Ula banjur ba ka jingpynmih ïa ki buit thymmai ha ka rep ka riang ka long kaba duna bha haba ïanujor bad kiwei pat ki liang, kumta donkam ban phai khmat bha ha ka jingpynpaw nam ïa ki mar, ka rukom song bad ka rukom kyntiew khnang ba kan lam sha ka jingseisoh.
U Dr. Ch. Srinivasa Rao, ula pyllait paidbah ïa ka kot sah kynmaw bad ula plie ruh ïa ka jingpyninam ïa kaba la ïa shim bynta da ki nongpynïaid ïa ki mar na kylleng ki jylla.