Nongpoh, Risaw 04: U Syiem ka Hima Nongspung u Paiem Petrick Syiemiong u la byrngem ban ujor syndon da ka ejehar halor ka jingpyntrei beaiñ jong ka Assam ïa u surok haka shnong Bakhlapara ha Ri Bhoi ba nangno ki ioh jingbit ban pyntrei wat haka jaka ba hap ha u pud u sam ka jylla meghalaya.
Haba kren sha ki lad pathai khubor naka liang u Paiem Petrick Syiemiong Syiem ka Hima Nongspung u la ong ba tang hadien bala ioh jingtip ba kala don ka jingtih surok ha katei ka shnongshnong da ki briew kiba na Assam mar mar u bthah ïaki briew na Warmawsaw bad Umsohbar ban leit peit bad khmih ha ka ba la lap shisha ba ka don ka jingtih surok bad mar mar kum u Syiem u la ujor ruh sha u OC ka Patharkhmah bad Rani ba kin leit khmih ïa katei ka jingtih surok beaiñ ha katei ka shnong bad ban pynsangeh mardor hynrei kim shym lap haka por ba trei bad kum u Syiem um shym la hun bad leit ban aisa da ka jingthoh sa sha u CEM ban ujor halor katei ka jingkyntur pud ka Assam ha kaba haduh mynta ym pat ioh jingtip la ka KHADC kala shimkhia ne em.
Naka liang u Syiem u la ong ruh ba kam don kano kano ka jingpyntip halor katei ka jingshna surok beaiñ, bad katei ka jaka ba prong surok ka Assam kam dei ka jaka kajia pud hynrei ka dei ka jaka jong ka Hima Nongspung bad ha katei ka jaka ka don ruh ka jaka thung dieng jong ka Bakhlapara VEC lyngba ka Jirang C&RD Block, hynrei kaba sngew lyngngoh ka long ba ka Assam ka prong napdeng katei ka kper thungdieng.
U la bynrap ruh da kaba ong ba naka liang ka Hima kam hun ïakatei ka jingwanrah surok ka Assam namar ka dei ka skhim na Assam bad dei ban pynsangeh noh mardor bad naka liang ka Hima kala rai ruh ban ujor da ka ejahar halor ka jingpyntrei beaiñ ïa katei ka surok bad mano ba ai jingbit ban pyntrei ïa katei ka kam.
Shuh shuh u la ong ruh ba kum ki nongshong shnong ha katei ka shnong ki dap da ka jinglynga bad ka daw baroh ka dei ka jingmutlop jong ka sorkar Meghalaya ba kam shym la peit bad khmih ban theh ki kam pynroi khamtam haki jaka khappud, kaba la pynshlur ïaka sorkar Assam ban tur pud da kaba theh da ki kam pynroi bad kyrpad ruh sha ka sorkar Meghalaya ba ka dei ban phaikhmat ban pynneh ïaki jaka puta ha katei ka thaiñ u la bynrap.
