Shillong, Risaw 04 : Ka Human Rights & Anti-Corruption Youth Power of India (MRAYP) jong ka Meghalaya Chapter ha ka sngi Balang ka la kyntu ïa u Lat ka jylla u Phagu Chauhan ba un bthah ïa ka sorkar jylla ba kan thaw noh da ka Police Accountability Commission (PAC) kumba la kdew ha ka State Police Act, 2010.
“Nga kyntu ïa u Lat ka Meghalaya ba un shimkhïa ïa kane ka bynta bad ka sorkar ba dei peit khamtam eh bad ka tnad Kampohiing, Chief Secretary bad Director General of Police ban pyntreikam ïa kane ka Act bad ban don ïa ka Accountability Commission na ka bynta ka jingbit jingbiang ka jylla bad khamtam eh na bynta ka jingïoh ïa ka hok ba dei,” ong u Working President ka MRAYP u Kingstone Bolwari ha ka shithi kaba la phah ruh sha u Symbud Myntri Rangbah ka jylla, Bah Prestone Tynsong.
La kyntu ruh ba donkam ban thung noh ïa u Chairperson bad kiwei ki dkhot ha ka Accountability Commission katkum ki kyndon jong ka section 73 (2), 74(1) (2) jong ka Meghalaya Police Act, 2010.
U Bolwari u ong ruh ba ha ka section 74 (2) jong ka Act ka la ong ruh ba u Chairperson bad ki dkhot ka Commission ki dei ban thung da ka kynhun kaba la pynkhreh da ka committee kaba kynthup naduh u Myntri Kampohiing ka jylla kum u Chairperson, Chief Secretary, Home Secretary bad Director General of Police da kaba bynrap ba ka Section 73 (2) ka kdew ruh ba ka sorkar jylla hapoh lai bnai ba don treikam kane ka Act, kan hap ban don noh ïa ka Commission.
Utei u Working President u ong ruh ba na ka daw ka jingbym don ka Commission, kam don satia ka rynsan kaba biang na ka bynta ki paidbah ban phah ïa ki jingujor pyrshah ïa ka jingshah thombor ha ki pulit bad ong ruh ba ki paidbah ki la ju mad ïa kine ki jingeh ha ki pulit.
