Shillong, Risaw 4 : Ka ïing Bishar High Court jong ka jylla mynta ka sngi Balang, ka la pynmih ïa ka hukum ba ym bit ban shalan ïa u dewiong ba la tih be-aiñ sha ki karkhana dewbilat lane karkhana coke kiba don hapoh ka Jylla.
Kane ka hukum ka la mih na ka ïing Bishar kaba la shong bishar da baroh ki nongbishar (Full bench) bad khlieh da u Chief Justice u Sanjib Banerjee haba shong bishar ïa ka mukotduma PIL halor kane ka kam.
Nalor ka kaiphod ba la aiti da ka Jylla, u Advocate General ula pyntip ba ka Jylla ka la ïoh ïa ki jingtip ba bniah bad don ruh ki jingtip kiba dang ap kiba ïadei bad ka jingdon u dewiong ba la pyndonkam da ki karkhaan ferro alloy, dewbilat bad ki coke.
U AG ula pyntip ruh ba haba shimkhia ïa ki jingshem jong u Justice Katakey ba la kdew ha kawei na ki kaiphod ba ula ai, ka Sorkar ka la ai show cause sha ki katto katne ki karkhana dewbilat hapoh ka Jylla.
Ka ïing Bishar ka la buh ban shong bishar biang ïa kane ka mukotduma hadien hynriew taiew haba bthah ruh ba u Justice Katakey u dei ban ïoh noh ïa ka jingsiew adhoc ba T. 4 lak nalor kiwei kiwei ki jingpynlut halor ki kam ba u la leh kat kum ki jingbthah ba la ai kham mynshuwa.
Ha kajuh ka por, ka ïing Bishar ka la bthah ïa ka Sorkar ba kan khmih halor ka jingkynnoh kaba mih pyrshah ïa ka Jai Maa Coal Private Limited bad ki kynhun ne briew ba khmih ïa ka, kaba la shah ujor lyngba ka PIL.
