Nongstoiñ, Risaw 04 : Ka jingduh noh ïa ka mang pisa ban shan surok na Kyndongei sha Mawrok, ka la pynsngew buhkhoh haduh katta katta ïa ki paitbah jong ki shnong na katei ka thaiñ, namar la slem bha ki la khmih lynti ba lada ka sorkar kan shna ïa ka surok na Kyndongei sha Mawrok, kan pynsuk ïa ki paitbah ha ka leit ka wan sha Rambrai bad kiwei kiwei ki shnong.
U bah Francis Wanñiang haba ïakren bad u nongthoh khubor, u la ong ba ha u snem ba la dep ki briew jong ka tnad PWD, ki la pyndep ïa ka jingsorbe naduh Kyndongei haduh Mawrok, na ka bynta ban phah ïa ka Detail Project Report sha ka sorkar, ba kan pynrung ha ka thup jong ka Pradhan Mantri Gramsadak Yojana.
Na ka bynta shiphew kilomitar kaba poi haduh madan Umit, ki la dep mang arphew klur tyngka ban pynlut ha kaba shna ïa katei ka surok. Hynrei ym tip na kaei ka daw ba katei ka mang pisa kam shym rung satia ha ka thup jong ka kam shna surok jong ka sorkar pdeng. Ka jingbym rung jong ka mang pisa ha ka thup shna surok jong ka sorkar pdeng, ka la long ka jingduh kaba khraw ïa ki paitbah katei ka thaiñ, khamtam ha ka leit ka wan ka kit ka bah bad bun ki jingdonkam.
U bah Wanñiang u la ong ruh ba wat la ki paitbah ki la duh noh ïa katei ka surok kaba la dep mang pisa ban shna ruh, hynrei haduh mynta kim shym la shongthait hynrei ki dang ïai bud dien bad pynkynmaw ïa ka sorkar, ba ka dei ban thaw ki lad ki lynti ban shna surok khnang ba kan pynsuk ïa ki paitbah.
U la ong ruh ba lada shna surok na Kyndongei sha Mawrok ka jingjngai ka long tang kumba khatsan haduh khathynriew kilomitar ei ei. Hynrei na ka jingbym don surok bad lada ki leit don kam sha Mawrok, ki hap ban ïaid da ka kjat kumba ar kynta shiteng ei ei bad ban poi haduh Rambrai, ka shim por kumba saw kynta kumta ka shem shitom shibun ïa ki paitbah kiba leit don kam.
U la ong ruh ba lada shong da ka kali pat hap ban leit na Nonglang shaduh Nongstoiñkaba jngai kumba laiphew hynriew kilomitar bad na Nongstoiñ sha Rambrai arphew kilomitar bad na Rambrai sha Mawrok pat khawei kilomitar. Lada kheiñ ïa ka jing jngai ka la poi sha duh hynñiewphew hynñiew kilomitar.
Kumta u la kyntu jur ïa kane ka sorkar ba mynta bad ïa u MLA ba kin shimkhia lem ha ka ban pynurlong ban pynïoh noh ïa ka surok na Kyndongei shaduh Mawrok na ka bynta ka jingmyntoi jong ki paitbah ka thaiñ.
