Ban ïa pyrkhat halor ka NEP dawa ka Academic Council ïa u VC ka NEHU ban lum jingïalang ba kyrkieh

Shillong, Risaw 4 : Ki dkhot ka Academic Council (AC) ka North Eastern Hill University (NEHU) ki la bthah ïa u Vice Chancellor (VC) bad Chairman ka Academic Council Prof P Shukla, ban khot ïa ka jingïalang ba kyrkieh khnang ban ïatai halor ka jingkynnoh pyntreikam khlem ïahap ïa ka National Education Policy (NEP) 2020 ha ka kyrdan Under Graduate na ka bynta ka samoi 2023-24 khlem ka jingmynjur ka Academic Council.
ïa kane ka rai la shim hadien ba u VC ula pynpaw ïa ka jingbym kwah ban khot ïa ka jingïalang ba kyrkieh jong ka Academic Council wat hapdeng ki jingkyrpad ba bun da ki nonghikai lyngba ki synjuk jong ki lem bad kiwei kiwei ki kynhun, ong uu President ka Teachers Association (NEHUTA) Prof Lakhon Kma ha ka kyrwoh bala pyllait mynta ka sngi Balang.
U ïathuh, “Ki dkhot ba don jingkitkhlieh jong ka AC ki sngewkhia jur halor ka jingkyntur ïa u pud ba ïadei bad ka bor jong ka AC bad ka jingpynkheiñ ïa ki kyndon bad rukom treikam kat kum ka NEHU Act, Statutes bad Ordinance”.
“Kumta, ki Dkhot ki la bthah ban khot ïa ka jingïalang ba kyrpang/kyrkieh jong ka Academic Council ban ïakren halor ka jingpyntreikam ba khlem ïahap ïa ka NEP 2020 ha ka kyrdan UG ha ki college ba la pynïasoh bad ka NEHU khlem da ïoh ïa ka jingmynjur jong ka Academic Council kat kum ka Regulation RA-5, Clause 13, under Clause (1) (a) bad (2) of Statute 42,” bynta u Prof Kma.
Une u Nonghikai ula ong ba ki dkhot ka Academic Council kim kwah satia ban ïakren halor ka jingpynsangeh noh ïa ka jingtreikam ka NEP hynrei halor ka jingdonkam kyrkieh ban pynbeit ïa ki rukom pynïaid ba bakla.
Palat 100 ngut ki dkhot jong ka Academic Council na Shillong bad Tura Campus ka NEHU ki la ïasoi ïa ka jingdawa ban khot ïa ka jingïalang ba kyrkieh bad kyrpang ka AC, kaba long palat ïa ka jingdonkam paid ba shipawa na ka laipawa ka jingdon ki dkhot ka AC kat kum ka Regulation RA-5, Clause 13, under Clause (1) (a) bad (2) of Statute 42, ong u Prof Kma.