Na ka jingther u lapbah iap 10 ngut jah rngai 82 kynthup ki shipai bad julor bun tylli ki ïing

Gangtok, Risaw 4 : Ka Sorkar Sikkim ka la pynthikna ba haduh 10 ngut ki briew ki la iap ha ka jingwan poi kynsan kynsan ka umsaw ha ka wah Teesta bad 82 ngut ki briew ki dang jah rngai ba kynthup ïa ki 23 ngut ki shipai.Kane ka long kat haduh ba thoh ia kane ka khubor mynta ka miet.
Kane ka jingshlei um ka la jia myn hynne ka step hadien ka jingther kynsan kynsan u lapbah lapsan hynnin ka miet ha ki bynta ba shatei jong ka Sikkim.
Ka Sorkar ka pyntip ba ki 10 ngut kiba iap ki dei ki riew paidbah. La ïathuh ruh ba paalt 3000 ngut ki nongshangkai pyrthei ki la sahkut ha kylleng ki bynta jong ka Jylla.
Ka Sorkar ka pyntip ba haduh 14 tylli ki jingkieng kila twa na kane ka jingshlei um bad 9 tylli napdeng jong ki, ki dei kiba la khmih da ka Border Roads Organisation (BRO) katba 5 tylli ki dei kiba khmih ka Sorkar Jylla.
Haduh 26 ngut ki briew kila wan poi sha ki hospital ha Chungthang kaba hap ha Mangan District bad Dikchu, Singtam kiba hap hapoh Gangtok District lem bad ka Rangpo kaba hap hapoh ka Pakyong District.
Ka Sorkar Jylla ka la pan haduh 3 pyrton ki kynhun ka National Disaster Response Force (NDRF) ban wan ïarap lem ïa ka Jylla bad ïa kawei ka kynhun NDRF kaba la don lypa ha Rangpo bad Singtam. La pyntip baka Sorkar Pdeng ka la ai ïa ka jingmynjur ban phah ïa kine ki kynhun.
Ka Sorkar Jylla ka la buh haduh 18 tylli ki relief camp ha Singtam, Rangpo, Dikchu bad Adarsh Gaon, kiba la mad ïa ka jing shah ktah ba jur eh ha kane ka jingshlei um.
Kumba 3000-4000 ngut ki briew kila poi mynta sha ka jaka sah ba shipor ha ka thaiñ bad ka jingwan ïalam ïa ki briew ba shah pynjulor ïa ki ïing ki sem sha ki jaka sah ba shipor namar ka um ka nang ïai kiew katba dang ïaid ka por, ong ki bor District.
U Myntri Rangbah ka Jylla u Conrad K Sangma ula pynpaw ba u sngewpangnud ban tip ba haduh 23 ngut ki shipai ka Ri bad 20ngut ki riew paidbah ki la jah rngai na ka jingpoi umsaw kynsan kynsan ka wah Teesta na ka jingther u lapbah lapsan ha Sikkim.
Ula pyntip ruh ba ula pyndem ha ki jingduwai na ka bynta ka jingshna bad ka bha ka miat jong ki Nongshong shnong ka Jylla Sikkim.
Haba thoh ha X, u Conrad ula ong “Sngewpangnud ban tip ba haduh 23 ngut ki shipai bad 20 ngut ki riew paidbah la pyntip ba ki la jah rngai hadien ka jingther kynsan u lapbah lapsan bad ka jingpoi umsaw ha Sikkim. Nga duwai na ka bynta ka jingshngaiñ bad ka bha ka miat jong ki Nongshong shnong”.
Ka jingther u lapbah lapsan bad ka jingshlei um ha Sikkim ka la pynjulor ïa bun tylli ki jingtei bad ktah ïa ka jingim ba manla ka sngi ha ki shnong kiba ïaid lynti ka wah Teesta.
Ka Sorkar ka la ïatreilang bad ki shipai bad ki kynhun ai jingïarap ban lap bad ïarap ïa kiba jah haba ai ruh ïa ki jingkyrshan ba donkam ïa ki briew kiba shah ktah.
Ki Nongshong shnong ha ki katto katne ki jaka, la bthah ba kin kynriah noh sha ki jaka ba long lum ban pynthikna ïa ka jingshngaiñ jongki.