Shillong, Risaw 04 : Ka National People’s Party ka la sdang shwa na Nongshken bad Langkyrdem – Laitkroh constituency ban pynbna ïa ki kyrtong kiban aireng ha kane ka elekshon MDC kaba la khmih lynti ba kan long ha ki bnai Rymphang – Lber jong u snem ban wan.
Ïa ki kyrtong ban aireng na kine ki constituency la pynbna ha ka sngi Ba-ar ha ka jingïalang kaba long ha Pynursla ha ryngkat ka jingdonlang u National Vice President ka NPP ba dei ruh u MLA ka Pynursla bad Symbud Myntri Rangbah ka jylla Bah Prestone Tynsong nalor ki nongïalam na ka District bad na ka Pynursla NPP Block.
Na Langkyrdem – Laitkroh ka party ka la jied da u Bah Rahbok Tynsong katba na Nongshken pat ka la jied da ka Kong Grace Kharpuri kaba dei ka MDC bad Executive Member ha KHADC mynta.
Haba kren ha ka jingïalang, u Bah Prestong u la ong ba ka jingpynbna kloi ïa ki kyrteng jong ki kyrtong ka long ba kin lah ban trei bad pynkhreh khambha shuh shuh na bynta ka elekshon kaban sa wan.
“Watla ym pat tip lano ka elekshon kan wan hynrei ngi kwah ban long kiba la pynkhreh lypa ban aireng ha kano kano ka por ruh. Kane kan ïarap ban pynjanai shuh shuh ïa ka jingpynkhreh ban poi suk sha ka thong,” u la ong.
Katba na ka liang u Secretary ka NPP East Khasi Hills, Bah Aibor Tynsong u la ong ba da ka jingïoh pynbna kloi ïa ki kyrtong kan ïarap ïa ki baroh arngut ba kin ïoh ban trei noh naduh mynta khnang ba ka party kan jop na baroh ar tylli kitei ki constituency na katei ka thain.
La donlang ruh ha kane ka sngi naduh u President ka NPP Pynursla Block, Bah Emlinstone Khongstia uba la pynbna ïa ki kyrtong nalor ki nongïalam na ki longkmie bad ki samla jong ka party.
Kumban shu kdew hangne, MDC ba mynta na Langkyrdem la bat da u Bah Ryngkat Lyndem na ka UDP katba na ka Nongshken pat da ka Kong Grace Kharpuri kaba dei na ka NPP hi.
