Nongpoh, Risaw 04: Wat hadien ba ka jylla Meghalaya bad Assam kila dep ban soi ïaka MoU haka jingpynbeit pud ha ka wat ba nyngkong, ka Assam kam shym la pyndem ïalade ban Kyntur pud sha ki bynta jong ka jylla Meghalaya ha kaba mynta ka kynti kala sdang ban shna surok biang haka shnong Bakhlapara wat hadien ba katei ka shnong la dep pynbeit ba kan hap hapoh u pud u sam ka jylla Meghalaya kaba hap ha Hima Nongspung.
Katei ka jingprong surok jong ka Assam haka shnong Bakhlapara kala paw ruh dang ha kine ki khyndiat bnai hadien ba ka sorkar Assam lyngba ka tnad PWD kala pynmang skhim haduh 71.59 lakh ban shna ïa u surok ba 1.203km na Patgaon sha Bakhlapara bala pyntrei da ka M/S Mahabahu Associate and Engineers
Katei ka jingsdang jong ka Assam ban pyntrei ïa utei u surok kala pynbitar ïaki sengbhalang ha kaba naka liang ka Confederation of Ri Bhoi People (CoRP) haka jingïalam u Samla, u Bah Bandari Ryntathiang President, ryngkat u Paiem Patrick Syiemiong, Syiem ka Hima Nongspung haka jingsynran lang ka KSU Western Border Area haka jingïalam u Samla Received Pator President, lem bad ki nongïalam ka Raid Warmawsaw mynta ka sngi kila leit ban leit jurip ïa katei ka jaka shna surok thymmai haka shnong Bakhlapara jong ka Hima Nongspung ha Ri Bhoi District bad lap ba katei ka jingshna surok kala ïaid shaid shaid.
Ka ba sngew lyngngoh ka long ba ha katei ka sngi naka liang ki paidbah nongshong shnong kim shym la nud ban mih wat hadien ba naka liang ka Raid bad Hima kila pyntip bala pynsuba jur ba kalah ban don kaei kaei sha lyndet ba dei ka jingmutlop jong ka sorkar jylla ban theh kam pynroi sha kitei ki thaiñ ba ka Assam ka nud ban tur pud da kaba theh kam pynroi.
Haba kren sha ki lad pathai khubor naka liang u Samla Bandari Ryntathiang u la ong ba kum ka seng ka dap da ka jingsngewkhia kaba jur ba kumno ka Assam ka dang ïai kyntur pud wat haka jaka kaba la tip shai ba kam dei ka jaka kajia pud bad kaba la pynhap haka jylla Meghalya hadien bala dep ruh ban soi ïaka memorandum of understanding hapdeng ka jylla Meghalaya bad Assam haka jingpynbeit pud jong ka wat ba nyngkong.
Shuh shuhg, u la ong ba kum ka seng kan sa leit ban ujor ruh sha u DC ka Ri Bhoi ba dei ban pynsangeh mardor ïaka jingpyntrei ïa katei ka surok bad ai por ruh shi taiew bad lada kam don kano kano ka jingshimkhia naka liang ka seng kan sa leit hi sha katei ka jaka ban pynsangeh mardor halor kane ka jinwan tam pud ka Assam sha ka khyndew ka shyiap ba hap hapoh ka jylla Meghalaya.
