Pynkynmaw ka KSU ïa ka KHADC “Em ïa ka jingtih Uranium, em ka lynti rel khlem ka ILP”

Shillong, Jylliew 28: Ka Khasi Students’ Union ha ka sngi Balang ka la leit ban ïakynduh ïa U CEM jong ka KHADC u Bah Pynïaid Sing Syiem bad ïa ki dkhot ka Executive Committe (EC) na bynta ban pynkynmaw ïa kiba bun ki mat kiba ka seng ka ïeng naduh ki snem kiba mynshuwa la ha kaba ïadei bad u Uranium ne ka lynti Rel bad ruh ïa ka jingpan jaka jong ki shipai ban tei ïa ka ktem jong ki.
Haba kren sha ki lad pathai khubor u President ka seng u Bah Lambokstarwell Marngar u la ïathuh ba ha ka jingïakynduh bad ka EC u Bah Pynïaid ka seng ka la ïoh ban pynsngew ïa kiba bun ki mat khamtam ha kaba ïadei bad ka jingkwah ka sorkar India ban tih Uranium ha ka jylla.
U la ïathuh ba ka seng ka la dawa ba ka KHADC kam dei da leilei ban ai ïa ka NOC ïa ka Uranium Corporation of India Limited (UCIL) bad ka sorkar India na bynta ban tih Uranium, ‘na ka liang ka EC ka pynpaw ba ka don ïa kane ka juh ka nongrim ba ngi shim ha kaba ïadei bad kane ka mat,’ u la ong.
“Kan ka jingwan ïa kynduh jong ngi ka long hadien ba ngi tip skhem ba ka UCIL ka ap beit kmang ban ïoh NOC ban tih ïa une u mar poh khyndew bad ngi tip ruh ïa ki buit ba ka leh ban pynbiej ïa ngi bad ka jingkhang khyrdep ka Atomic Minerals Directorate (AMD) ïa ka ophis jong ka ka dei tang ban tap eit miaw khang ba ngin ym suba sniew eiei, bad sngewkmen ba ka KHADC kat haduh mynta ruh ka ieng skhem beit triang halor ka nongrim kaba ki CEM barim ki shim” u la ong.
U la ïathuh ruh ba ka seng ka la dawa ba ka KHADC kam dei ban ai NOC sha ka sorkar India na bynta ban wanrah ïa ka surok Rel sha ka jylla katba ym pat pyntreikam ïa ka ILP ha ka jylla.
“Ngi kren da kaba shai ba da leilei ngim pdiang ïa ka lynti Rel ha ka jylla katba ym pat pyntreikam ïa ka ILP ha ka jylla bad lada ka sorkar ka kwah ban leh da ka bor kumba ka la leh ha u 2017 ngi ruh ngi kloi ban ïatyngkhuh biang kumba ngi leh ha utei u snem,” u la ong,
Haba kylli, u Bah Lambokstarwell u la ong ba ka KSU da leilei kan ym pdiang ïa ka surok Rel la kan dei ka Rel kit mar ne Rel kit briew.
“Ngim pdiang la ka Rel kit mar ne kit briew katba ym pat don ïa ka ILP ha ka jylla bad nga ïohi ba ka sorkar ka kwah tyngeh ban wanrah ïa ka surok Rel hynrei na ka liang ka KSU kam pdiang da leilei ïa kane namar wat ha ki trok kit ar ngi ïohi ba kumno ki mynder ki poi wat ha ki trok kit mar sha ka jylla,” u la ong.
“Ha jaka ba ka sorkar kan shimkhia ban ïoh pynpoi ïa ka surok Rel ngi kwah ba kan shimkhia ïa ka jingdawa ILP ha ka jylla namar kumba long mynta ngi ïohi ba ka sorkar pdeng ka leh klet ïa kane bad ka sorkar jylla ruh kam shimkhia eiei ban pynkhlaiñ ïa ka jingdawa ILP ha ka jylla,” u la bynrap.
U la ong ruh ba wat ïa ka Entry bad Exit Point ha Bynrnihat kaba la tei kum ka jaka talasi mynder kat kum ka kyndon jong ka Meghalaya Residents Safety and Security Act (MRSSA) ka sorkar ka pynkylla pynban sha ka jaka talasi covid.
“Na ka liang ka KHADC ruh ka pynpaw ïa ka juh ka nongrim bad ka seng ha kaba ïadei bad kane,” u la ong.
Shuh shuh u la ïathuh baka seng ka dawa ba ka council kam dei ban shu ai NOC kat ïa ki shipai kiba kwah tei ïa ki ktem jong ki ha ki bynta ba hap hapoh ka jylli synshar jong ka KHADC.
“Na ka liang u CEM bad ka KHADC ki kular ba ngin ym shu ai kyrkieh ïa kino kino ki NOC ba pan ki shipai ban tei ïa ki ktem jong ki bad u kular ba shuwa ban ai kan don ka jingbishar kaba bniah ïa ki kot ki sla jong ki,” u la ïathuh.
Haba ïoh ban ïakren bad u Bah Pynïaid u la ïathuh ruh ba ka KSU ka la pynsngew sha u ha kaba ïadei bad ka jingthmu ka sorkar pdeng ban pynkylla thymmai ïa ka Sixth Schedule.
“Na ka liang jong ngi ngin phah jingthoh sha ka sorkar na bynta ba kan khot ïakren ïa baroh lai tylli ki ADC kiba don ha ka jylla ban ïatai ïa kane ka mat khang ba ngin ïoh ban phah ïa ki jingai jingmut jong ngi”, ong u Bah Pynïaid.