Pynkylla noh ïa ka Reservation Policy ne phiah noh ïa ka jylla Meghalaya : Robert Kharjahrin

By Mawphor News Desk On Nov 4, 2022

Shillong, Naiwieng 03 : U President jong ka HYC, u Bah Robertjune Kharjahrin, u la ong ba lada ka sorkar jylla kam lah ban pynkylla noh ïa ka Reservation Policy ne ka bhah thungkam, dei ban lum da ka dorbar ba kyrpang bad ban mynjur noh da ka Resolution ban phiah noh ïa ka jylla Meghalaya hapdeng ki Khasi Jaiñria bad ki Garo.
ïa kane u la pynpaw hadien ba ki ka HYC ryngkat bad ki 4 tylli Seng ba kynthup ïa ka HANM, ENJC, JSM bad CoRP ki la leit ïakynduh ïa u Bah Prestone Tynsong, Symbud Myntri Rangbah ka jylla ban ïakren halor ki 9 tylli mat jong ka Save Hynñiewtrep Mission (SHM).
“Nalor ba ka Reservation Policy ka la noh shiliang lypa, mynta la mih sa ka Roster System, ngi, ngi la nang duhnong duhnong shuh shuh, namar hap ban phai dien biang naduh u snem 1972”, la ong u Bah Robert, da kaba bynrap ba lada treikam da ka 40% ha ki District lei lei, ka mut ba ki Khasi Jaiñtia ki la duh kam syndon.
“Ym de ba ngi kren ban wanrah jingïasngewpher hapdeng ma ngi bad ki paralok Garo, hynrei kata kadei ka jingshisha”, la ong u Nongïalam ak HYC.
“Ngi dawa jur ba ka la dei ka por ïa ka sorkar jylla ban pynkylla lut noh ïa ka Reservation Policy namar kumno ka Jaidbynriew ba don 15-16 lak ngut kan ïoh ïa kajuh ka bhah bad ka Jaidbynriew ba don tang kumba 8-9 lak ngut ki nongshong shnong,” u la ong.
Nalorkata, u ong ruh ba ka seng ryngkat bad kiwei pat ki seng ba kynthup naduh ka HANM, EJNC, JSM bad ka CORP ki ieng beit ha ka nongrim ba lada ïa kane ka bynta ym lah ban pynbeit la dei ban phiah noh ïa la ka jong ka jylla.
Da kaba pynshai ba katei ka sienjam ba ki shim kadei satia ka sienjam ba ki long pyrshah para Jaidbynriew u President ka HYC u la ong, “Kadei ka pat ka jingshisha kumno ngin ïoh lang mar katjuh ka bhah haba ka jingdon ki briew ka la jan long marshiteng.”
Shuh shuh u la kyntu ruh ïa baroh ba ki dei ban buh hakhmat eh ïa ka ishu bhah thungkam thungjam ha kane ka elekshon ban wan khnang ba kan ym don shuh ka jingshah ktah ki longdien haba ïadei bad katei ka bynta.