Pynkut noh ka World Vision India Ri Bhoi ADP ïa ki prokram ai jinghikai ha ki 5 tylli ki shnong ha Ri Bhoi

By Mawphor News Desk On Jul 9, 2023

Nongpoh, Naitung 08: Kum kawei na ka seng treimon sngewbha kaba ju ai jinghikai sha ki shnong bapher bapher ha Ri Bhoi ban kyntiew ïa ka bha ka miat jong ka imlang ka sahlang, ka World Vision India Ri Bhoi ADP ha ka 7 tarik mynta u bnai ka la pynkut noh ïa kawei ka prokram ba la ai kyrteng, ‘ Life School transfor mational Development’ kaba la sdang naduh ka 3 tarik u Naitung 2023 ha ki san tylli ki shnong ha Ri Bhoi District.
Kitei ki san tylli ki shnong ba la pynlong ïa ki prokram bapher bapher da ka World Vision India Ri Bhoi ADP ki kyntup ïa ka shnong Kyrdem, Mawkyrdep, Umket, Mawpun bad ka shnong Mawbsein ba hap ha ka Bhoirymbong C&RD Block ha Ri Bhoi.
Ïa kane ka prokram la pynkut ha ka jingïalang ai jinghikai ha ïing Dorbar Hall ka Shnong kyrdem ha kaba la wan ban shim bynta naduh ki khynnah skul, ki nonghikai bad ki paidbah nongshong shnong. Ïa kane ka prokram la pynïaid da u Samla Lamjingshai maring, uba dei ru Program Coordinator ka World Vision India Ri Bhoi ADP.
Haba pynkut ïa kane ka prokram ki khynnah skul ki la ioh lad ruh ban ai ïa ki jingrwai, ki jingshad bad ki drama lyngkot kiba long shi bynta ka jingthmu jong kane ka prokram ba la lamkhmat da ka World Vision India Ri Bhoi ADP.
U Bah Paul Wahlang, uba dei u District Child Protection Officer ka Ri Bhoi District u la wan ban shim bynta kum u kongsan, u Bah Durka A. Lakiang, CDPO Bhoirymbobg Block kum ka symbut kongsan bad la sakhi lang ruh da ka jingdon lang u Anjan Sangma, Project Officer ka World Vision India Ri Bhoi ADP, u Bah P. Mukhim, Rangbah Shnong ka Kyrdem bad kynthup ruh kiwei kiwei ki riew rangbah.
Kumba la ai jingkren da u Anjan Sangma, uba dei u Project Officer ka World Vision India Ri Bhoi ADP, u la ong ba ka jingthmu jong kane ka prokram ba la tip kum ka ‘ Life School transformational Development’ ka dei ka prokram kyrpang ban ai jinghikai kyrpang sha ki khynnah ba kin tip ïa ka akor ka burom, ka jingkordor ka pule ka puthi, ka jingkordor ka koit ka khiah bad khamtam ba ki khynnah ki dei ban tip ïa ka kata ka hok (Child right) ba kum ki khynnah ki dei ban lait na ka jingshah banbeiñ ne ka jingshah lehbeiñ ha ka imlang ka sahlang.
U Bah Paul Wahlang, District Child Protection Officer, haba kren ha kane ka sngi kum u kongsan u la ai ka jingïaroh ïa ka World Vision India Ri Bhoi ADP, kiba la lah ban pynlong ïa kane ka prokram ba kyrpang ban ioh jingmyntoi ki khynnah bad khamta ha kane ka juk ki khynnah ki dei ban tip ïa kata ka hok long briew man briew jongki. U la kham ban khia ruh halor ka jingeh jong ki khynnah ba ki ïa kynduh ha kine ki sngi ba ngi dei ban ai kata ka jingïarap kyrpang ïa ki khynnah ban lait na kino kino ki jingshah lehbeiñ ha ki ing ki sem ne ha ka imlang ka sahlang
Shuh shuh, u la ai mynsiem ruh ïa ki khynnah lada ki don kiba leh beiñ ne ki shem jingeh ki dei ban long kita ki khynnah kiba shlur ban ïathuh ïa ki jingeh sha ki kmie ki kpa, ne ki bor shnong bad wat sha ki bor ba dei peit ïa ki khynnah, khnang ba kum kita ki bor ba dei peit kin ai ka jingïada ba kyrpang ïa kum kita ki khynnah kiba kynduh jingeh ha ka imlang ka sahlang.
Na ka liang u DCPO ka Bhoirymbong C&RD Block, u Bah Durka A. Lakiang u la batai ruh halor ki jingktah ba bha bad ba sniew da kaba u la ai nukssa ruh haba ki briew ki ktah na ki bynta bym dei ban ktah hapoh ka dkhot met, kata ka dei ka jingthmu basniew ba dei ban kiar na kum kita ki briew. Shuh shuh, u la kren ruh halor ka hok ki khynnah ba kynthup ïakata ka Right to Survival, right to development, right to protection bad ka right to participation.