Shillong, Naitung, 08: U Myntri Rangbah ka Jylla Meghalaya u Conrad K. Sangma ryngkat ka jingsakhi lang jong u Chief Justice jong ka Ingbishar Meghalaya High Court u Sanjib Banerjee ki la plie paidbah ïa ka shlem treikam ba thymmai jong ka Ïingbishar Meghalaya High Court ha ka sngi Saitjaiñ.
Ha kane ka sngi, la sakhi lang da ka Myntri kaba peit ïa ka tnat Aiñ jong ka Sorkar Jylla ka Dr. Mazel Ampareen Lyngdoh, u Myntri ka tnat Pule Puthi u Rakkam Sangma, ki nongbishar jong ka High Court bad kiwei kiwei.
Ha kane ka shlem treikam ba thymmai ba la tei ha ka jinglut kaba kot 45 klur tyngka ka don ïa ka Auditorium, ka jaka shong jong ki nongsaid aiñ bad kiwei kiwei de ki kamra na ka bynta ka treikam ka treijam.
Haba kren ha jingïalang, u Conrad K. Sangma u la ai khublei ïa ki jingtrei shitom kaba la lah ban tei ïa kane ka building kaba thymmai. U la ong ba kane ka shlem treikam ka dei kaba la shna kyrpang ban buh ïa ki kot kiba ai jingtip shaphang ka aiñ kiba ïadei bad ka jingai ïa ka hok sha ki paidbah.
U la ïaroh ruh ïa ka Meghalaya High Court kaba la long ka nongïada ïa ki nongrim jong ka hok, ka jingtreikam kaba shai bad ka jingpynïoh ïa ka hok sha baroh.
U la ïathuh ba ka Sorkar ka la buh hakhmat ïa ka thong ban pyndep lut ïa baroh ki jingshna hapoh ka jylla. U la ïathuh ba ka jingmang pisa ha ki snem baladep ka long ban pynjanai bad ban kyntiew kyrdan ïa ki government LP bad UP schools, bad ïa ki Higher Education.
Haba ïathuh ïa ka thong jong ka Sorkar halor ka pule ka puthi, u Myntri Rangbah u la ong, ba ka jingmaramot, ka jingshna pynbna bad ka jingtei thymmai palat 2500 tylli ki LP & UP School kin sa nang wan ha kine ki sngi bad ki snem.
Kane ka jingshimkhia ka long ban pynjanai ïa ka pule ka puthi bad ban ai sha ki khynnah skul ïa ki lad jingpule kiba bha ha baroh kawei ka jylla.
Ka jingtheh pisa jong ka Sorkar ban shna ïa ki skul ka long ban pynkhlaiñ ïa ka thymmei jong ka pule ka puthi ha ka jylla. Da kaba shna ïa ki shlem pule kiba bha bad ka jingdon jong ki tiar pule, ka sorkar ka la angnud ban ailad ïa ki khynnah skul ba kin dup kynjoh sha ka thong kaba ki la pynlut ïa ka jingim jong ki ha ka pule puthi.
U Chief Justice jong ka Ingbishar Meghalaya High Court u Sanjib Banerjee, u la pynkynmaw ba ka shlem treikam kaba thymmai kan pynjanai ïa ki jingtreikam jong ka bishar ka khadar.
