Nongstoiñ, K’lyngkot 08: Ka Seng Samla Shnong Mawïonglumsyntiew Social & Cultural Sport Club, ha ka sngi balang ka la pynkut noh ïa ka jingrakhe ïa ka Jubilli Rupa jong ka jingdap arphewsan snem naduh ba la seng ïa ka.
Ka jingpynkut ïa katei ka Jubilli Rupa ka la long kaba ishongkun bad kaba iphuh iphieng bha, ha kaba ki samla jong ka shnong kynthei bad shynrang, ki la ïamih ryntih ha ryngkat ki riew rangbah jong ka shnong naduh u sordar ki dkhot ka Executive Committee jong ka shnong ki longkmie bad ki paitbah.
Ha kane ka sngi ka Seng Samla Shnong ka la pynlong ruh ïa ka jingpynkup burom ïa ki samla kiba wan sha khmat ha ki kyrdan pule jong ki ha ki jaka pule bapher kiba don hapoh ka jylla bad shabar na ka jylla.
Ha ka juh ka por ka Seng Samla ka la pynkup burom ruh ïa ki nongïalam bad ki nongkitkam kiba rim jong ka Seng Samla, kiba la trei shitom bad btin lynti ïa ki samla hapoh ka shnong ba kin trei shitom ha kiba bun ki bynta ha ka ban ai ka jingshakri ïa ka shnong ka thaw bad ka imlang sahlang.
Ha katei ka sngi na ka liang ka Seng Samla Shnong Mawïonglumsyntiew ka la khot sngewbha ruh ïa ki riew rangbah, ki riew pawkhmat jong ki shnong, ki nongïalam jong ki seng saiñ pyrthei bad ki sengbhalang bapher bapher kiba don ha sor Nongstoiñ.
Ha ka jingpynkut ïa katei ka jingrakhe ïa ka jingdap arphewsan snem jong ka Seng Samla Shnong, u bah Gabriel Wahlang MLA ka Nongstoiñ u la long u kongsan bad u bah C.P.Mawkon Additional Deputy Commissioner ka West Khasi hills kum u symbud kongsan.
U bah Gabriel Wahlang haba ai jingkren kum u kongsan ha katei ka sngi u la ong ba ka jingïaid lynti jong ka Seng Samla ha ki arphewsan tylli ki snem, kam dei kaba suk namar ki hap ba mad shibun ki jingshah kynnoh bad ki dieng pyngkiang ha ka jingtrei kam jong ki.
U la ong ruh ba kum ki samla ki dei ban ïeng skhem bad kim dei ban kynran dien wat hapdeng kiba bun ki jingeh ba ki ïakynduh. U la sam ruh ïa ki khunsam sha ki samla kiba la wan shakhmat ha ka jingpule jong ki.
Nalor nangta, u la pyllait ruh ïa ka kot pynsah jingkynmaw ïa ka jingïaid lynti jong ka Seng Samla ha ki arphewsan tylli ki snem ryngkat ka shap jong ka Seng Samla Shnong Mawïonglumsyntiew bad pynhiar ruh ïa ka lama kum ka dak jong ka jingpynkut ïa ka jingrakhe ha katei ka sngi.
