Shillong, Nailar 27: Hadien kumba ar snem khlem shah rem, ka Nongskeh ka la shah pynliem noh da 1-0 ha ka Shillong Lajong ha kawei na ki jingïalehkai jong ka lympung Shillong Premier League 2026 kaba la long hynne ka sngi Palei, ha SSA Stadium.
Ka Nongkseh kam pat ju shah rem ha kino kino ki lympung jong ka Shillong Sports Association naduh u bnai Naiwieng jong u snem 2024 hynrei kane ka la kut noh hynne ka sngi Palei da ka penalty ha ka minit kaba 55 lyngba u Lalmuansanga ka Lajong.
Ho-oid ka Lajong ka la pynliem ïa ka Nongkseh ha ka Durand Cup ha u bnai ba la dep hynrei ka SLFC ka don ïa ka kynhun kaba kham kyrpang na ka bynta ki lympung National-level. Katba ha kane ka lympung jong ka thaiñ ka Nongkseh ka la long kaba khlaiñbor, ha kaba ka la jop arsien bad ïakhaid arsien ha ki jingïakhun ba kine ki arliang ki ïakynduh.
Katei ka penalty jong ka Lajong ka la wan namar ka handball hapoh phyllaw kol jong ka Nongkseh, bad kane ka la plie lad ïa u Lalmuansanga ba un pynkhihjar bad buh hakhmat ïa ka kynhun.
Watla ki la don katto katne ki jingpyrshang thep kol na baroh arliang hynrei ka jingïakhun ka la kut da tang katei ka shi kol kaba la pynlong ïa ka SLFC ban khur pura ïa ki lai point.
Hadien ka jingpyndep ïa ka Round kaba lai ka Mawlai ka dang lamkhmat ïa ka miej, bud sa ka Meghalaya Police ha ka kyrdan ba ar bad ka Shillong Lajong ha ka kyrdan ba lai. Baroh ki la kamai mar 7 point hynrei ka Mawlai ka don ïa ka jingapher kol (goal difference) kaba kham bun (+6), bud sa ka MLP (+3) bad ka Lajong (+2).
Ha kane ka sngi Thohdieng, ka Laitkor kaba wan kyrdan ba phra (3 point) kan aireng pyrshah ïa ka Langsning, kaba bat ïa ka nam lahduh, kaba don mynta ha ka kyrdan ba saw da 6 point, ha ka por 3:40 baje nohphai sngi.
