Mih ki khynnah ïalehkai ka Meghalaya ban leit sha Bengaluru na bynta ka BC Roy Trophy 2026-27
Shillong, Nailar 27: Ka kynhun ïalehkai jong ka jylla Meghalaya ki ban ïakhun ha ka lympung Junior Boys National Football Championship 2026-27 (Tier 1) na ka bynta ka Dr BC Roy Trophy ki la mih na nongbah Shillong ban leit sha Bengaluru hynne ka sngi Palei.
Ha kane ka lympung ka Meghalaya ka la shah kynthup ha ka Group C ryngkat ka Tamil Nadu, Mizoram bad ka Maharashtra. Ki lahduh jong ki Group kin ïohrung sha ka semifinal.
Ka Meghalaya kan ïakhun ïa ka jingïalehkai ba nyngkong ha ka 01 tarik Nailur pyrshah ïa ka Tamil Nadu. ïa kane ka kynhun kaba don 20 ngut ki dkhot yn ïalam da u coach ba la shemphang bha, u Playerson Jitem Syiemlieh.
Hashwa ba ka kynhun kan mih la pynlong ïa ka jingïalang kitbok kitrwiang kaba lyngkot ha madan MFA ha ka jingïadon lang u President ka Meghalaya Football Association u Bah Hamletson Dohling, u Vice President ka MFA bah Cliff Nongrum bad u Chairman ka Youth Development Cell bah Freddy Kharpran nangta kiba ha iing ha sem jong ki khynnah.
Haba ai mynsiem ïa ki khynnah, u bah Hamlet u la pynkynmaw ïa ki shaphang ka jingdonkam jong ka jinglong ryntih, hapoh bad shabar ka madan. Kane ka dei ka kabu ksiar na ka bynta ki nongïalehkai ban tyngshaiñ ha ka lympung ïalehkai National Level katba ki nang kiew ha ka jingïalehkai phutbol jong ki, u la bynrap.
Ka thup kyrteng ki nongïalehkai ka Meghalaya ki long:
Franky Kharkrang, Mangpaka Nongkynrih, Aiborlang Mulieh, Sannaky Nongsiej, Kishan Wahlang, Shanborlang Khonjee, Samuel Malieh, Seibok Lyngdoh, Damankynsai Marbaniang, Albin Kharbani, Malenga N Sangma, Skhemlang Myrthong, ME Matlai, Adriel Nongbet, Pyrkhat Marbaniang, Wallambok Thongni, Aibannangkhraw Kharumnuid, Andrew Kharsati, Habankhlur Lyngdoh Mawnai, Haban Kara Blah
Support staff:
Playerson Jitem Syiemlieh (head coach), Snenglang Wankhar (assistant coach), Amit Rai (manager), Levon Lyngdoh (physio)
Ka prokram ïalehkai jong ka Meghalaya:
Pyrshah ïa ka Tamil Nadu, 01 tarik Nailur, 11 baje mynstep
Pyrshah ïa ka Maharashtra, 03 tarik Nailur, 11 baje mynstep
Pyrshah ïa ka Mizoram, 05 tarik Nailur, 8:30 baje mynstep