Pynlong ka NSS Ri Bhoi College bad USTM ïaka Khelo India Dialogue ban rakhe ïa ka National Sports Day
Nongpoh, Nailar 27: Kum shi bynta ban rakhe ïa ka National Sports Day, ka NSS Unit jong ka Ri Bhoi College, Nongpoh, bad skulbah USTM ka la pynlong ïa ka “Khelo India Dialogue” bad Khelo India Samvaad: PM ke sath mynta ka sngi, ha kaba ki samla pule ki la ïoh ïa ka lad ban sngap bad ïashim bynta ha ka jingïakren bad u Myntri Rangbahduh ka Ri, u Narendra Modi, halor ki lad ki lynti ban kyntiew ïa ka kam ïalehkai ha ka ri.
Ha kane ka prokram kaba la long ha Ri-Bhoi College la wan ban sakhi bad ai mynsiem da u Bah Matthew Kenneth Makdoh Nominated, MDC ka KHADC, ryngkat ka Kong Mercia Dohling, Boxing Coach jong ka Ri Bhoi District, u Samla Johny Nongrum, uwei na ki rangïakura kiba la paw ha ka jylla, ka Kong E. Kharkongor, Principal jong ka Ri Bhoi College, ka Kong Y.V. Syiemlieh, Programme Officer, NSS, Ri Bhoi College, lem bad kiwei ki nonghikai, ki nongïalam bad ki samla pule jong ka college, katba ha skulbah USTM la sakhi da ka jingdonlang ki heh ophisar ka State Level Co-ordinating Agency jong ka Ministry of Social Justice and Empowerment lem bad ki samla pule.
Lyngba kane ka prokram, ki samla pule ki la ïoh ïa ka lad ban sngap bad ïashim bynta ha ka jingïakren jong u Myntri Rangbahduh ka Ri, u Narendra Modi, halor ki mat kiba ïadei bad ka kam ïalehkai. Ki la ïoh ruh ban ïasam ïa ki jingmut bad jingpyrkhat halor ki lad ki lynti ban kyntiew shuh shuh ïa ka kam ïalehkai sports bad ban pynmih ïa ki sap kiba don hapdeng ki samla jong ka ri.
Hadien ka jingïakren, ki samla pule jong ka Ri Bhoi College ki la ïoh ruh ïa ka lad ban ïaphylliew jingmut bad ki nongïalehkai kiba la don bynta ha ka kam sports ha ka jylla, kiba kynthup ïa u Samla Johny Nongrum bad ka Kong Mercia Dohling. Ki la ïasam ïa ki jingshem bad ki jingtip jong ki ha ka liang jong ka sports, ryngkat bad ka jingai mynsiem ïa ki samla pule ba kin shim ïa ka kam ïalehkai kum kawei na ki lad ban pynroi ïa ki sap jong ki, ban tei ïa ka lawei bad ban mih shakhmat ha ki rynsan ïalehkai.
Ka National Sports Day la ju rakhe ha ka ri man la u snem ha ka 29 tarik Nailar, kum ka dak ban kynmaw burom ïa ka sngi kha jong uwei na ki nongïalehkai hockey ba pawnam tam jong ka ri, Major Dhyan Chand.
Lyngba ki prokram kum ka Khelo India Dialogue, la khmih lynti ba kan nang pynshlur bad pynkhih ïa ka mynsiem jong ki samla ban ïashim bynta ha ki jingïalehkai bapher bapher, ban kyntiew ïa ki sap jong ki bad ban ïoh ïa ki lad ki lynti kiba kham bun ha ka liang jong ka sports.