Nongpoh, Jymmang 15: Kum ka jingpynshlur bad ka jingai mynsiem ïa ki samla don sap bad kiba ju wan rah ïa ka nam bad ka burom ïa ka dong bad ka thaiñ lyngba ki kam khraw ba ki la leh, ka Umsning Town Durbar mynta ka sngi ka la pynkup burom ïa u Samla Lapynshai Syiemlieh kaba dei hadien ba u la wan rah ïa ka nam ka burom da kaba u la ioh ban khur ïa ka takma rnong na ka lympung ïalehkai ba la tip kum ka World Championiship Mauythai ba la pynlong da ka International Federation Mauythai Association ha ka ri Thailand kaba la sdang naduh ka 4 tarik u Jymmang bad la pynkut ha ka 13 tarik u Jymang 2023 ha katei ka ri.
Ïa kane ka jingpynkup burom ïa la don bynta lang naduh ka Seng Longkmie Umsning Pyllun, ka Seng HITO Umsning Circle ka Umsning Cultural Sports Club ha kaba la pynlong ha Umsning Auditorium Hall.
Kum ban pynkynmaw, kane ka jingpynkup burom ka dei ruh hadien ba une u samla u la wan phai na Thailand ryngkat katei ka takma rnong kaba u la ioh ban khur ha kaba haduh 120 tylli ki ri ka pyrthie ki la wan shim bynta ha kane ka lympung ban ïa knieh ïa ki nan jop ne ki takma.
U Samla Lapynshai Syiemlieh u la ioh khur ruh ïa ka takma rnong na katei ka lympung ha ka thup jong ki 23 snem ka rta ha ka jingkhia kaba 48 kg. ïa kine ki samla ba la leit shim bynta na ka jylla sha katei ka lympung ha ri Thailand la ïalam da u Bah Angelus Sun, uba dei u Coach bad kum u nonghikai ruh ïa kine ki samla ba la pyntbit ban aireng ha katei ka jingïakhun ha Thailand.
Haba ai jingkren ha kane ka sngi ba la pynkup burom ïa u Samla Lapynshai Syiemlieh, u Bah Anjelus Sunn kum u Coach bad u nonghikai kine ki samla ula ïathuh ba haduh 120 tylli ki kynhun na ki ri ka pyrthie ki la wan shim bynta ha kane ka lympung bad kaba dei ruh ka jingrakhe ïa ka International Federation Mauythai Association ïaka lyngkhuh dap snem kaba 30 jong katei ka kynhun.
U la ïathuh ruh ba nalor jong u samla Lapynshai Syiemlieh sa 3 ngut kiwei pat kiba la leit ban ïa shimbynta sha katei ka lympung hynrei kim shem la lah ban rah ïaka nam jop, ha kaba la synran ruh ïa ki da u Bah Anjelus Sunn bad u Bah Pynsuk Sumer kiba long ha kajuh ka por kum ki Referee bad ki Judge ha katei ka Lympung.
Kiwei kiwei kiba la ïa don lang ha kane ka jingpynkup burom ïa u samla Lapynshai Syiemlieh, ki kynthup naduh u Chairman ka Umnsing Town Durbar, u Bah Rocky Kylla, u Bah R. Khonghat, Rangbah Shnong ka Umsning Proper A, u Bah Rocky Marwein, Rangbah Shnong ka Umsning Proper B, ka Kong M. Kharnaior, President ka Seng Longkmie Umsning Pyllun, I Kong Margret Pathaw, ka nongïakhun kti ba paw ha ka pyrthei bad kynthup kiwei kiwei ki nongïalam shnong bad ki riew rangbah.
Ha kane ka sngi, nalor ka jingleh burom ïa une u samla, la don ruh ki jingkren bad ki jingai mynsiem da kitei ki riew rangbah kiba la pynpaw ka jingsarong halor ka jingmih ki khun samla don sap kaba long ka burom ym tang ïa ka ïing ka sem, ka shnong ka thaw bad na ka bynta ka jylla bad ka ri hi baroh kawei. Ki la ai mynsiem ruh ïa ki khun samla don sap da kaba kyntu ba kim dei ban duh mynsiem haba don ki sap ki phong bad kum ki khun samla ki dei ban don ïa ka thong ban long kita kiba paw bad kiba ioh jingmyntoi shisha na ka sap kyrpang ba la ai da u Blei.
