Shillong, Nailur 02: Kum shi bynta ban pynkup burom ïa kawei na ki samla ha ka jingïakob thei bhabriew, ka St. Anthony’s College, ha ka sngi Nyngkong, ka la pynkup burom ïa ka samla pule Political Science ka Angelia N. Marweiñ, kaba la shah jied ban mihkhnat ïa ka Meghalaya ha ka jingïakob Femina Miss India 2024.
Ha kane ka sngi la wan ban ïashim bynta da ki nonghikai bad ki samla pule bad kiwei kiwei kiba la shah khot sngewbha ban lehkmen ïa kane ka jingjop bad jingnoh synniang jong ka Angelia na ka bynta ka jylla kaba la long ruh kum ka jingwanrah burom ïa ka jylla hi baroh kawei.
Ha kaba ïadei bad kane na ka liang u Principal ka St. Anthony’s College u la ïaroh ïa kane ka jingïaid lynti ka Angelia kum ka samla pule kaba trei shitom sha ka jingtbit ha kiba bun ki liang.
“Ka Angelia ym tang ba ka la paw ha ka jingpule hynrei ka la kiew shaphrang ruh ha ki kam kiba ïadei bad ka imlang sahlang ha kaba ïadei bad ki hok jong ki kynthei bad ban don ïa ka jingryngkat kyrdan hapdeng ki shynrang bad ki kynthei. Ngi dap da ka jingsngewsarong ba kan mihkhmat ïa ka Meghalaya ha ka rynsan ïakob kaba pawnam ka Femina Miss India 2024 bad ngi don ïa ka jingngeit kaba skhem ba kan pynlong ïa ka jylla bad ïa ka College ka jong ngi kaba sngewsarong,” bynrap u Principal.
Lah ban ong ba ki kam jong ka Angelia ha kaba ïadei bad ka Maitshaphrang Movement bad ka jingdon bynta ka jongka bad ka EARMACS, ban kyntiew ïa ka roi ka san ha ki thaiñ nongkyndong ha Khasi Hills bad Meghalaya, ki dei kiba la pynpaw kum kita ki jingnoh synniang ha ka jingkyntiew ïa ka imlang sahlang.
Lah ruh ban ong ba ka Angelia ka la sdang ïa ka jingïaid Model da kaba ïatreilang bad ki kynhun kiba pawnam bad ban ïashimbynta ha ki Fashion Event kiba kynthup ïa ka Delhi Times bad Lulu Fashion Week. Dang shen ka la ïoh ïa ka khusnam Femina Miss India Meghalaya 2024.
Na ka liang jong ka, haba ai jingkren ha kane ka sngi, ka Angelia ka la pynpaw ïa ka jingsngewnguh ïa ka St. Anthony’s College kaba la ai ïa ka jingkyrshan kaba ratbah ha ka jingïaid lynti ka jong ka.
“Ka St. Anthony’s College ka la long ka jaka ai jingnang jingstad ïa nga bad ki jingtip bad ki jinghikai kiba nga la ïoh ki la ïarap ha ka ban tei ïa nga kum ka briew kaba nga long mynta. Nga dap da ka jingsngew burom ban mihkhmat ïa ka Meghalaya bad ban rah shakhmat ïa kane ka jaka pule haba nga ïakhun ïa ka rynsan ïakob thei bhabriew Femina Miss India 2024,” ong kane ka thei samla.
Ka nongjop ïa ka Femina Miss India 2024 kan ïoh ban mihkhmat ïa ka ri India ha ka rynsan ïakob thei bhabriew ha ka pyrthei ne ka Miss World kaba 73. Ka Miss India kaba mynta ka Nandini Gupta kaba na Rajasthan, kan pynphong ïa ka pansngiat ïa ka nongjop ha ka sngi kaba kut jong ka jingïakob kaba dei ban long ruh kum ka rynsan kaba paw bha ha ka ri.
